Khrih Thawngin Thil Zeipaoh Tuah Kho Tu Kan Si

Filipi (4:13) Thawnnak a ka petu khrih thawngin zeizong vialte ka tuah khawh kho hna.

Carson siangbawi nulepa Hakha a rak phak tikah, Carson siangbawi pa cu amah tein inn aa sak. Thing a lak. Lung a thiar. Harsa ngai in rian a tuan. Cucu a nupi Laura nih a hmuh tikah a zangfak ngaingai. Laura nih hi bantuk thil hna cu na tuah bal mi an si tung lo, tiah a ti. Carson nih a leh mi cu, "Filipi (4:13) thawnnak a ka petu khrih thawngin zei thil paoh ka tuah khawh ko hna" timi hi a si. 

Bawipa Nawl A Zul Mi Hna Nih Nun Sithatnak An Hmuh

Psalm [37:18-19] Bawipa nih a nawl  zul mi cu a zohkhenh zungzal hna i ram cu anmah ta a si zungzal lai.  Caan tha lo a tlun tikah sifah an ing lai lo. Mangtam a tlun tikah ei awk a za an ngei lai. 

Minung kan nunnak ah ram ka pakhat i phung kan zulh tikah kan him. Thil sual pakhat khat kan tuahsual zong ah cu phung nih a kan kilven. A kan huhphenh. Cu bantukin zumtu hna nih Bawipa nawl kan zulh tikah a kan zohkhenh zungzal. Caan tha lo hna caah hnangamnak a kan pek. Baibal nih a kan cawnpiak bantukin Bawipa nih harsatnak caan caah sifahnak chungin khamh a kan duh tikah a nawl a zul mi si ding a kan duhpiak. Zeicatiah Amah nih zeizong vialte a theih dih. Kan caah thil tha kan hmuhnak ding lam vialte a thei dihtu a si.  

Pakpalawng Chungin Rosung Thil Hna Chuahtertu Bia

Roman 4:17 [ Mithi kha a nunter i, a um lomi thil a bia in a umtertu kha  a si] 

Bia hi thawnnak a ngei tiah ka rak tial lengmang. Cucu sersiam khawhnak thawnnak a si. Nihin kan chim mi bia cu thaizing kan nunnak sersiamtu a si. Zeizong vialte ser a si hlan ah Bia cu Pathian he a rak um. Cu Bia cun zeizong vialte ser kan si. Minung Pathian peknak nunnak le thaw a ngei mi kan si. Cucaah minung nih bia kan chim thawnnak a um ve. 

Zei Bia Dah Na Chim Tawn?

Psalm (107:2-3) - Bawipa nih a khamh mi vialte hna, amah cu thangthat u sih. Nan ralkut chungin an chuah hna i ram dang in an tlunpi hna, nichuah, nitlak, chaklei, thlanglei in an tlunpi hna.

Bawipa nih a khamh mi hna zumtu kan caah dingthlu tein khuaruah khawhnak, a dik mi thil zumhnak kan ngeih khawh nakding hi a biapi. Sihmanhsehlaw Bawpa thawnnak cu zeitik ahdah kan nunnak chungah thawnnak a ngeih ti ahcun ka " Lei" nih bia a chim tikah a si. Ka hmurka le kan lei nih bia a chim i zumhnak bia kan chim mi cungah thawnnak nganpi  a um. Midang sinah na va chim theng a hau lo. Nangmah nangmah le nangmah sinah na chim mi bia chungah thawnnak a um. Nangmah le nangmah kong naa chim tikah, "zeitindah na chim tawn?" Na chawkawlnak rian sunghnak na tong ko lai. Sihmanhsehlaw " thluachuak mi ka si" tiah na chim khawh ko. Asiloah "mi vanchia ka si. Pathian nih sual a ka phawt" tiin maw na chim lai? 

Teitu Ah Kawh Mi Kan Si

Matthew [17:20] - Hihi philh hlah uh. Antam ci tiate hmanh zumhnak nan ngeih ahcun, hi tlang hi," i thawn" ti u law aa thawn ko lai. Zeipaohpoah kha nan tuah khawh ko lai.

Nifatin Bible ca kan rel tikah Pathian nih a hman mi hna an nunnak hi thatnak le khuaruah thiltuahkhawhnak lawngin a khat ko tiah kan ruah tawn. Thadam tein nitin an nunnak zeihmanh harnak tong loin an um rua tiah kan ruahsual tawn hna. Sihmanhsehlaw kanmah bantukin nitin an nunnak ah thil an ton ve ko hna. Sihmanhsehlaw an nunnak cu Bawipa nawlngaihnak le a bia cungah zumhnak ngei buin an nung zungzal. 

Malaysia Chin Miphun Hna Nih Singapore Chin Hna An I Zohchunh Ding A Si

Kum 70 Tlinnak Chin Miphun Ni (2018) cu vawlei cung ramkip Chin miphun hna an umnak hmun paoh ah tuah cio a si. Miphun Ni timi biafang hrimhrim hi miphun pakhat kan sinak le miphun timi a sunlawinak zong faktuk in a langhter. Cu ruangah hlandeuh ralkap cozah chan ah miphun ni timi hman ding hi an rak duh lo. Aruang  cu Miphun in kan dir tikah Kawl miphun le vawlei cung miphun vialte hna he aa tluk ruang mi tinvo kan ngei kho tinak a si. Kawl pawl nih an duhnak ahcun Myanmar National timi lawng hi um in, Kawlram miphun chungah Chin timi cu miphun tengnge pakhat a si timi (2nd Class National) ah chiah hi an i timh mi a si. Sihmanhsehlaw Kawl miphun he kan nunphung le caholh aa pehtlaihnak pakhat hmanh an um lo. Anmah bantukin miphun tling pakhat kan si ve ko. Cucaah a phunphun in kan holh hi hmang thiam lo dingin an rak i zuam. Chin holh le caa in catial le chuah khawhnak zong an rak kan kham. Asinain a zatawk cu an hlawh a tling. Nihin ah Kawl holh deuh in Chin Miphun Ni kan hmang hna. Sihmanhsehlaw kan tei te ko lai. Falam khuapi ah Falam holh in Chin Miphun Ni hman cu Kawlpa a hnursualnak a um lo. Hakha khuapi ah Hakha holh in Chin Miphun Ni biachim le hman cu Kawlpa a hnursualnak a um lo. Mindat ah Cho holh, Paletwa ah Khumi holh, Tedim ah Tedim holh, tiin Chin Miphun Ni hman nih a sualnak a um lo ii, miphun dang nehsawhnak zong aa tel lo. Ramdang hna belte ah Chin Miphun vialte kan hmanti ruangah aa khat lomi tampi chungin kan i khahnak kan kawl ii Kawl holh kan hman. Cucu a sualnak a um ve lo. 

Mitha Hna Cu An Tluk Zongah An Tho Than Zungzal

Proverb (24:16) - "Mitha cu voi sarih tiang tlu hmanh seh law a tho than zau lai. Sihmanhsehlaw mitha lo cu vanchiatnak nih a hrawh hna"

Minung nunnak hi a mak ngaingai. Nunnak hi ser khawh a si lo nain a rawh a fawi taktak mi a si. Kan mit hmuh lo thil hmetete zong nih kan nunnak an donghter khawh. Cu lawng siloin kokek sining a lonh kho fawn lo. Cucu zeidah a si ti ahcun zungzal in nun khawh a si lo. Zeitluk mi ngandam kan si zongah kan kum a upat ahcun thihnak thlanmual lei ah a panh thluahmah mi lawngte kan si ko.