Malaysia Chin Miphun Hna Nih Singapore Chin Hna An I Zohchunh Ding A Si

Kum 70 Tlinnak Chin Miphun Ni (2018) cu vawlei cung ramkip Chin miphun hna an umnak hmun paoh ah tuah cio a si. Miphun Ni timi biafang hrimhrim hi miphun pakhat kan sinak le miphun timi a sunlawinak zong faktuk in a langhter. Cu ruangah hlandeuh ralkap cozah chan ah miphun ni timi hman ding hi an rak duh lo. Aruang  cu Miphun in kan dir tikah Kawl miphun le vawlei cung miphun vialte hna he aa tluk ruang mi tinvo kan ngei kho tinak a si. Kawl pawl nih an duhnak ahcun Myanmar National timi lawng hi um in, Kawlram miphun chungah Chin timi cu miphun tengnge pakhat a si timi (2nd Class National) ah chiah hi an i timh mi a si. Sihmanhsehlaw Kawl miphun he kan nunphung le caholh aa pehtlaihnak pakhat hmanh an um lo. Anmah bantukin miphun tling pakhat kan si ve ko. Cucaah a phunphun in kan holh hi hmang thiam lo dingin an rak i zuam. Chin holh le caa in catial le chuah khawhnak zong an rak kan kham. Asinain a zatawk cu an hlawh a tling. Nihin ah Kawl holh deuh in Chin Miphun Ni kan hmang hna. Sihmanhsehlaw kan tei te ko lai. Falam khuapi ah Falam holh in Chin Miphun Ni hman cu Kawlpa a hnursualnak a um lo. Hakha khuapi ah Hakha holh in Chin Miphun Ni biachim le hman cu Kawlpa a hnursualnak a um lo. Mindat ah Cho holh, Paletwa ah Khumi holh, Tedim ah Tedim holh, tiin Chin Miphun Ni hman nih a sualnak a um lo ii, miphun dang nehsawhnak zong aa tel lo. Ramdang hna belte ah Chin Miphun vialte kan hmanti ruangah aa khat lomi tampi chungin kan i khahnak kan kawl ii Kawl holh kan hman. Cucu a sualnak a um ve lo. 

Sihmanhsehlaw Chin Miphun Ni kan upat ning hi kan i dang cio. Nihin ni tiangah cun "Chin National Spirit" nakin nuamhnak civui (Pyopuai Suunpuai) tuahnak thinlung thlarau nih a hruai deuh. Kan nau le tete hna nih February (20) hi Chin miphun caah zeitlukin dah a biapi timi zong an thei ti hna lo. Lamphot, Donhthlei cung hlasatnak tuah phot khi Chin Miphun Ni cu a si rua tiah kan ruah sawhsawh. Hihi vawlei cung khuaza ramkip ah a um mi Zatlang Bu Hruaitu kip nih ruah cekcek a hau mi a si. 

Cu lakah nuamhnak civui thinlung nih a kan hruai tikah Chin mi tampi cu zu te loin an i nuam kho ti lo. Vawlei cung minung umnak paoh ah zu cu a um. Sihmanhsehlaw mahlemah i uk khawhnak thinlung ngei lo tiangin nuamhnak civui a zawh mi cu Chin miphun hi kan si. Cu lakah a zualhma mi hi kum 2018 ahcun Malaysia ram ah a um mi Chin miphun unau hna hi an si men lai. Atu kan chan ah zei paoh hi thuh khawh a si ti lo. Minung hmai ah kan thuh khawh hmanh ah Pathian hmai ah aa thup kho ding kan si hlei lo. Minung hmai hmanh ah atu chan ahcun thuh khawh a si ti lo. Mi kip nih vawlei cung hmai ah phozar khawh nak kan ngei cio cang. Tukum Chin Miphun Ni tuahnak zoh tikah Malaysia Chin miphun, minung pakhat hnih tuahsernak cu zoh a chia ngaingai. 

 Kawlram lei in hlasa ah an sawm mi Jenevi cu tla dengmang in, tlu lakin an dawh ko. Cu lawng siloin a leng zongah zalam cungah an i si. An i vel rih. Atu chan ah sik le velh hi cu zohchia ngaingai khi a si. Khuaruahnak a ngei lomi saram hna rian ah chiah cang mi a si. Cheukhat nih kan uico pawl hmanh an i seh lo, tiah an ti theo. 

Malaysia Chin mino rual hna nih Singapore Chin mino hna hi, hi bantuk lei ahcun an i zohchunh hna awk a si. (Zeidang ah  i zohchunh ding tampi an ngei ve ko lai). Zeicaah ka tial ngam ti ahcun Singapore a um mi Chin mino hna hi Chin miphun zatlang bu sinah tha tein aa tel tum mi hna khi, kan tluk hna lo. Singapore ah Chin nu pawl an minchia, zu an ding nan ti kho men. Khi hna pawl hi Chin phun hawi sin zongah aa tel lomi, Chin Miphun Ni tibantuk caan zongah a chuak lemlo mi an si. Hna thiang lawlaw khi an si. 

Singapore Chin miphun hna nih ram le miphun ca zongah thatnak an tuah mi cu mipi sinah a langhter theng lai lo. Sihmanhsehlaw anmah le hmunhma tein ningcang tein thiltha tuahnak ah thazang an pe zungzal. An i manh lo chunh te thlakhat voikhat an chuah mi zong Pathian thangthatnak hmun ah an chuak. Mibu cawlcanghnak tete ah an chuak i thazang an pe. Kan thlahlawh man tlawmte hmuh mi chungin miphun le ram caah a herhnak tete ah thazang an chuah hna. Nuamhnak tuah caan an i nuam. Sihmanhsehlaw luanlak in an um bal lo. Cun ralthatnak ah an ral a tha ii, ningzahnak ah ningzah a thei mi lungfim lawngte an si. Hlasaknak donhhlei cungah va kai i va lam khi sual ah maw Laimi nih kan ruah rih ka thei lo. Online cungin kan soi len hna. 

Chin Miphun Ni ahcun Singapore Chin mi hna uar an umnak cu... milian ee, bawi deuh ee, ti a um lo. Mizeipoah khi hmunkhat ah donhlei cung kan kai kho dih hna. Kan thu kho dih hna ii, khat le khat upatnak he kan i nuam kho hna. Sihmanhsehlaw zohchia pakhat hmanh an um hna lo. Khat le khat an i nuamhnak ah an i lunghmuih.  

https://www.facebook.com/LcfYouthSingapore/videos/1569480969811836/

Hlasatu sawm mi pawl hna zong mipi lakah an i chok, an vaak nain, dawh hnursual an tong lo. An lam hla an sak bawmh hna. Ningcang tein nun hi an thiam i, nuamh an thiam. Mi hmai ah chuak ngam tung loin, mi hnu lei in soisel a hmang mi an si hna lo. Ningzahnak zawn le ningzah lonak zawn khi an thlei dang thiam. Cucu thinlungput le khuaruah ning he aa pehtlai mi a si. Mizeihmanh khi nang cu khi Chin ee, kha Chin ee, tiin izohnak zong a um lo ii, Chin Miphun Ni ahcun mithmai panh tein aa thei lomi hna zong, " a hlan ah kan i hmu ko nain" Chin kan si kan i theih tung lo tiin, hmunkhat te ah lam caan ah an lam. 

Ralkap le palik security zong khi Singapore Chin miphun nih an herh lem hna lo. Anmah le chiatha thleidannak thinlung tein rem tein caan an hmang kho hna. A dih tik zongah tuanvo thei bu tein anmah le hmunthur te maw an i fim cio ii an tin cio.  

Si velhnak cu chim lo. Hmurka hmanh in biachia in aa chawn mi le aa hrocar mi theih awk a um lo. An hmurka in a chuak mi cu " Happy Chin National Day" timi hi a si. Mithmai panh tein an i chawnbia hna. Zeitindah khat le khat fek chin in Chin Miphun chung ah kan i funtom khawh lai timi pehtlaihnak le hawikomhnak tu hi a kawl mi lawngte an si. Myanmar Chin nih Singapore nu pawl an ral a tha tiah a hun langhter. Cucu a hman mi a si zong. An ral a tha. Sihmanhsehlaw ralthatlonak ah a raltha mi an si lo. An tuahsernak nih ningzahnak a chuah ter lo. Hmaichiatnak a chuahter lo. Cucu i cawn awk tha an si. Cucaah Malaysia a ummi Chin Miphun hna Singapore Chin miphun hna lungput hi an i zohchunh ding a si.