Khrih Thawngin Thil Zeipaoh Tuah Kho Tu Kan Si

Filipi (4:13) Thawnnak a ka petu khrih thawngin zeizong vialte ka tuah khawh kho hna.

Carson siangbawi nulepa Hakha a rak phak tikah, Carson siangbawi pa cu amah tein inn aa sak. Thing a lak. Lung a thiar. Harsa ngai in rian a tuan. Cucu a nupi Laura nih a hmuh tikah a zangfak ngaingai. Laura nih hi bantuk thil hna cu na tuah bal mi an si tung lo, tiah a ti. Carson nih a leh mi cu, "Filipi (4:13) thawnnak a ka petu khrih thawngin zei thil paoh ka tuah khawh ko hna" timi hi a si. 

Nihin zumtu vialte hna zong hi thawnnak a kan petu khrih thawng in zeizong vialte tuah khawhnak a ngeitu kan si. Jesuh cu kan caah "leverage" a si. Leverage timi cu - nangmah pumpak thazang in lung nganpi na nam len kha. Sihmanhsehlaw a rittuk caah na nam kho lo. Nangmah minung thazang le kutke in a si kho bak lo. Asinain thirfung naa lak ii, thirfung tangah lung hme deuh na danh piak. Cun na kalh tikah na kutke in na thial khawh lomi lung nganpi cu aa thial kho. Cu thial khawhnak caah na hman mi thirfung le lung danh cu "Leverage" timi cu a si. 

Kan nunnak zong ah cu bantuk cu a si. A chel caan ahcun minung kan sinak in kan khuaruah khawhnak zong nih a phan ti lo. Kan ngeih mi chawva thazang zong nih a phan kho lo. Kan caah harnak lung nganpipi hna cu thial khawhnak thazang kan ngei hna lo. Sihmanhsehlaw kan caah thawngtha cu- Jesuh khrih sinin zeizong vialte tuah khawhnak thazang a ngei mi kan si.  "Thawnnak a ka petu Khrih thawngin thil zeipaoh ka tuah khawh ko hna!" ti chalh buin kan hmai a um mi zeizong vialte cu tuah ko usih. Bawmtu tha bik a ngei mi kan si. Bawipa min cu thangthat si ko seh.