Bia hi thawnnak a ngei tiah ka rak tial lengmang. Cucu sersiam khawhnak thawnnak a si. Nihin kan chim mi bia cu thaizing kan nunnak sersiamtu a si. Zeizong vialte ser a si hlan ah Bia cu Pathian he a rak um. Cu Bia cun zeizong vialte ser kan si. Minung Pathian peknak nunnak le thaw a ngei mi kan si. Cucaah minung nih bia kan chim thawnnak a um ve.
Kan bia kaa khat nih mi pakhat nunnak a nunnak a thlen khawh. Kan bia kaa khat nih mi pakhat a hrawhhralh khawh i a thah khawh ve. Cucaah kan hmurka in a chuak mi bia kip hi zei Bia dah an si timi a biapi ngaingai. Kan von pehzulh rih a si ahcun zei bia dah chim dingin kan i thim timi a si. Kan pawngkam thil tha lo kan hmuh tikah zei bia dah chim dingin kan i thim? Lungdong mi kan hmuh hna tikah zei bia dah chim kan i thim? Kan pawngkam thil sining hna ningcang loin an um tikah zei bia dah chim kan i thim? Midang a sersiamtu bia maw kan chim? Midang lungdonghternak bia dah kan chim. Bia kaa khat kan chim mi kip hi relchih an si dih.
Cu nakin a biapi bik mi cu nangmah le nangmah kong ah zei Bia dah naa chim timi hi a si. Nangmah kong ah nangmah nih na chim mi Bia cu naa hmuh ning langhtertu an si. Damlonak le vanchiatnak nih an tlun tikah " Ka dam kho ti bal lai lo. Vanchiatnak he hrin mi ka si. Ka chuah thla hrimhrim a tha lo" tiin na chim. Asiloah " ka dam deuh tuk cang. Atu hnu zarhkhat ah ka dam piang cang lai. Thluachuak mi si dingin ser mi ka si. Thluachuak mi nun in a nun ding ka si. Nihin ka dirhmun cu caan tawi ca lawngah a si. Vanchiatnak cu a um lo." tiin dah na chim. Kanmah kong ah kanmah nih nihin ah kan chim mi bia cu thaizing kan nunnak muisam an si. Minung nunnak cu chim mi bia a eiding mi a si. Bia tha kan chim tikah kan nunnak nih a theipar a din-ei mi cu thatnak kha an si ko lai. Bia tha lo kan chim tikah kan nunnak nih a theipar a din-ei mi cu thatlonak hna kha an si ko lai.
Minung kan bia nakin a thawng deuh mi cu Pathian Bia hi a si. Pathian Bia nih pakpalawng chungin nika, thlapa, arfi le vawlei siseh, vawlei cung le vawlei tang ah a um mi thil vialte siseh a ser dih. Cu thil vialte khua zei in dah an rat. Pathian Bia in a rak i ser mi lawngte an si. Nihin kan nunnak hmunhma ah zeihmanh a um lo. Kan ngei lo tiah pakpalawng bantukin kan i hmuhnak thil tampi an um ko lai. Zeihmanh a um lomi thil chungin zeizong vialte a umtertu nih cun zeihmanh a um lomi na nunnak chungah man ngei mi rosung thil tampi a umter khawh ko. "Nothing to Something" a tuah kho tu Pathian bia a si.
Kalay Sianghleiruun kan kai tikah kum hram thok ahcun kan lungthawhnak le thanuam in kan khat. Sihmanhsehlaw kum 5 kan hungphat tikah sianginn dih in zeidah kan tuah lai timi biahalnak nih zeihmanh chim kho lo in a kan tuah tawn. Midang nih an kan hal ah siseh, kanmah le kanmah kan i hal zongah siseh, chim awk kan ngei tawn lo. Cu lio ah midang nih an kan hal tikah pakhat khat chim lo cu kan i nautat ve. Cu lio ah a fawi in ka leh mi hna cu "Singapore ah ka kal lai" ti hi a si. Cu lio ka dirhmun ah Singapore kalnak lam hi zei pakhat te taktak hmanh kan ngei lo. Pakpalawng a si ko. Ka ruahnak chung zongah le kan mitthlam zong ka suai kho lem lo. Asinain midang nih an ka hal fatinte ka chim tawn mi a si. Ka chim dih in kal ding taktak zong in kaa ruat lem lo. Sihmanhsehlaw kum 2 a rauh tikah Singapore ram ka phan. Sianginn kaipi hawikom rual lenti lio sianginn kai caan hna mitthlam an cuang tawn. Zeitluk harsa in kan rak tlonlenti hna timi ka ruahthan tikah,"Ruah lopi in bia kan chim mi hna zong a taktak ah an cang ko hi ta" timi ka hun i fiang. Kan bia chungah thawnnak a um taktak hi ta timi ka nunnak nih a hun i fiang.
Ka nunnak hi chuahhlan in leiba ngeicia bang. Sianginn ka dih tikah chawva zei hmanh ka ngeih lo pin ah leiba nih ka liang pahnih in an ka nenh. Ka nunnak hmai ah hawibantuk in kal kho loin, hnu lei ah cu leiba thilrit hna nih an ka hnuhchih. Cu lio ah kan thinlungah a chuak mi cu a philh in ka philh kho lo. Ka nunnak hi pakpalawng a si ko hi ta ka ti. Chawva zeihmanh a um lo tikah Singapore cu a hlat tuk rih. Yangon le Hakha kalnak hmanh a ngei lomi ka si. Sihmanhsehlaw ka sianginn kai lio ah Bia ka rak chim cang mi a um ii, cu Bia ning in Pathian nih rian a tuan tikah zeihmanh innka a um lomi chungin innka bi tete an rak i ong. Ka nunnak a fiang chinchin mi cu Pakpalawng chungin rosung thil hna nunnak a chuahter khotu cu kan chim Bia a si ko hi ta timi a si.
"Bia" chungah thawnnak nganpi a um. Cu thawnnak thazang cu hmannak nawl ka ngei. Cheu cu bia tha a zatawk, bia tha lo a zatawk a chim mi deuh kan si. Cucaah kan nunnak zong cu bantuk ning tein a nung ve.
No comments:
Post a Comment