Bawipa Nawl A Zul Mi Hna Nih Nun Sithatnak An Hmuh

Psalm [37:18-19] Bawipa nih a nawl  zul mi cu a zohkhenh zungzal hna i ram cu anmah ta a si zungzal lai.  Caan tha lo a tlun tikah sifah an ing lai lo. Mangtam a tlun tikah ei awk a za an ngei lai. 

Minung kan nunnak ah ram ka pakhat i phung kan zulh tikah kan him. Thil sual pakhat khat kan tuahsual zong ah cu phung nih a kan kilven. A kan huhphenh. Cu bantukin zumtu hna nih Bawipa nawl kan zulh tikah a kan zohkhenh zungzal. Caan tha lo hna caah hnangamnak a kan pek. Baibal nih a kan cawnpiak bantukin Bawipa nih harsatnak caan caah sifahnak chungin khamh a kan duh tikah a nawl a zul mi si ding a kan duhpiak. Zeicatiah Amah nih zeizong vialte a theih dih. Kan caah thil tha kan hmuhnak ding lam vialte a thei dihtu a si.  

Zumtu hna nih zeitik caan ah nun sifahnak kan ton ti ahcun Bawipa nih a kan hruai ning tein a nawl zul loin a hartuk ruangah siseh, kan hawi midang nunnak siarem deuh kan hmuh ruangah siseh, a kan hruai ningin a nawl zul duh loin kanmah duhnak lam in kan kal tawn tikah sifahnak le harnak in kan dong tawn. 

Minung cu zingka kan thawh tikah zanlei zei bantuk sining in dah ni kan liam te lai timi hmanh a hmu kho lomi kan si. Sihmanhsehlaw Pathian nih kan chuah hlan in kan dongh tiang a hmu khotu a si. Cucaah zumtu hna cu Baibal chung ah tuu in a kan tahchunh i Jesuh cu tukhal tha he a tahchunh tawn. Tuu zong khi khua hlatpi a hmu kho lomi saram an si ve ti a si. Cucaah tuu hna nih tukhalpa awk cu an ngaih ii, tukhalpa nih a hruai hna ning tein an hmailei ah an kal ti a si. Zeicatiah  tukhal pa cu khuazei ahdah tiva le cerhti hna an um, timi a hngal khotu a si. Khuazei lam in dah hramh no ringdidel a umnak hmun phak khawh a si timi a hngaltu a si. 

Cucaah hi Baibal nih a kan cawnpiak bantuk in Bawipa nawl a zul mi cu harnak caan ah sifahnak an ing lai lo, tiah a ti. Mangtam tlun tik zongah ei awk khim cu an ngeih zungzal lai tiah a ti. Bawipa min cu thangthat si ko seh!