Mitha Hna Cu An Tluk Zongah An Tho Than Zungzal

Proverb (24:16) - "Mitha cu voi sarih tiang tlu hmanh seh law a tho than zau lai. Sihmanhsehlaw mitha lo cu vanchiatnak nih a hrawh hna"

Minung nunnak hi a mak ngaingai. Nunnak hi ser khawh a si lo nain a rawh a fawi taktak mi a si. Kan mit hmuh lo thil hmetete zong nih kan nunnak an donghter khawh. Cu lawng siloin kokek sining a lonh kho fawn lo. Cucu zeidah a si ti ahcun zungzal in nun khawh a si lo. Zeitluk mi ngandam kan si zongah kan kum a upat ahcun thihnak thlanmual lei ah a panh thluahmah mi lawngte kan si ko. 

Cu tluk rawh a fawi mi nunnak cu vawlei thil tampi nih harnak an pek rih. Thil tampi nih kan nunnak hi nenhchih le nam chih an i tim zungzal. Lungrawhnak le khenkhamtu thil tampi kan ton hna. Ngandam lonak nih a kan tlunh hnawh. Kan pawngkam minung hna he i remlonak ruangah lungretheihnak nih a kan nenh lengmang. Lungdongh le hnuchit taak hi a fawi ngaingai. Sihmanhsehlaw mitha hna cu Bawipa thatnak a hmu kho. Bawipa thatnak le kut thawng an hmuh tikah thinlung ah thawh thankhawhnak thazang an ngei than. Chim duh mi cu na nunnak zalam ah harnak, khenkhamtu thil hna nih an in thluk zongah na tho kho than ti nak a si. Thil pakhat khat nih kan nunnak a kan thluk tikah tho in dir than kan herh timi philh lo ding a si. 

Zumtu pakhat kan sinak in kan philh lo ding mi cu thihnak tei in a tho than mi Jesuh thawnnak aa hrawm mi kan si. Zeibantuk zuamcawhnak hmanh nih an har tuk lo. Zeibantuk dawnkhantu thil hmanh hi lonh dingah an sang tuk lo. Zeibantuk zawtnak le damlonak hmanh hi tei khawh loin an lianngan lo. Zeibantuk harnak, zebantuk minung hmanh hi Bawipa nih an timhpiak mi nunnak le thluachuah na co khawh nakding ah na tei khawh lo tiangin an lianngan lo. Na herh mi cu Bawipa biakam zumhnak hi a si. Harnak hna cu na thanchonak ah an cang lai. An mawhchiattu hmurka hna cu an lawm tu hmurka ah an cang lai. Cu ti thlen khawhnak thazang cu pek kan si. Na sual an kawltu minung hna cu nangmah an dirhkamhtu ah an cang lai. 

Mitha hna cu thluk an si zongah, an tho than zungzal. Sihmanhsehlaw mitha lo hna cu anmah tuahsernak lila nih ngaihchiatnak a pek hna. Anmah chim mi bia lila nih lungnuam loin a tuah hna. Anmah chiah mi rap nih anmah tu a fawi tawn hna. Nihin mitha  si i thim ko usih. Kan tlu ko lai. Tho than usih. Fek tein dir than ko usih. Kanmah minung lei in cun thawh than khawh lo a fawi te. Sihmanhsehlaw thawnnak vialte a kan petu Bawipa sinah toidor tein hal zungzal ko usih. Bawipa cu kan thawnnak le kan zeizong a si. Kanmah phuhlam a hau lo. Bawipa nih phu a hlam te ko lai. Kanmah lehrulh a hau lo. Dai tein kan um tikah Bawipa nih riantuan aa thok zungzal. Bawipa min cu thangthat si ko seh.