Zei Bia Dah Na Chim Tawn?

Psalm (107:2-3) - Bawipa nih a khamh mi vialte hna, amah cu thangthat u sih. Nan ralkut chungin an chuah hna i ram dang in an tlunpi hna, nichuah, nitlak, chaklei, thlanglei in an tlunpi hna.

Bawipa nih a khamh mi hna zumtu kan caah dingthlu tein khuaruah khawhnak, a dik mi thil zumhnak kan ngeih khawh nakding hi a biapi. Sihmanhsehlaw Bawpa thawnnak cu zeitik ahdah kan nunnak chungah thawnnak a ngeih ti ahcun ka " Lei" nih bia a chim tikah a si. Ka hmurka le kan lei nih bia a chim i zumhnak bia kan chim mi cungah thawnnak nganpi  a um. Midang sinah na va chim theng a hau lo. Nangmah nangmah le nangmah sinah na chim mi bia chungah thawnnak a um. Nangmah le nangmah kong naa chim tikah, "zeitindah na chim tawn?" Na chawkawlnak rian sunghnak na tong ko lai. Sihmanhsehlaw " thluachuak mi ka si" tiah na chim khawh ko. Asiloah "mi vanchia ka si. Pathian nih sual a ka phawt" tiin maw na chim lai? 


Vantha dingin ser mi ka si. Teitu siding in kawh mi ka si, tiin bia kan chim tikah dawntu thil tampi nih an kan tlaih tikah zongah dawntu hna cu bawmtu ah thlenkhawhnak thawnnak a um. Cucu na biachim mi chungah a um ko. Nihin hi ka caah thil tha bik a ka petu a si. Tukum cu ka caah kum tha a si, tiah kan chim tikah Bawipa zangfahnak cu kan nunnak chungah a rak kir than. Ka hmailei nunnak cu kan chim bantukin a kan sersiampiak. 

Bawipa nih kan caah a kan pek cia cang bantukin, kan co hlan a herh. Cu cohlannak le cohlanlonak cu na hmurka, na lei le dang cungah a um ko. Bawipa nih an kan pek mi thil vialte cungah innka kan on ii kan cohlan tikah  Bawipa zangfahnak le bawmhnak le thluachuahnak hna cu kan nunnak chungah an lut ii, teitu le hlawhtlinnak a hmutu dirhmun ah a kan cawi san. 

A kan dawntu thil vialte le kan ral vialte sinah a kan luater ii, kan caah thiltha hna cu nichuah, nitlak, chaklei, thlanglei in kan sinah a phak ter hna. Mirang Bible ahcun, " Let the redeemed of the Lord Say so" tiah a langhter. Bawipa nih a chim bantukin " Say so" tiah a ti. Cu nih a langhter mi cu "Chim- Say" hi a si. "Think so", " believe so" tiah a ti lo. "Say so" tiah a ti.  Zei bantuk bia dah na chim tawn. 

Nihin ah kan chim mi bia hi "Biatha" maw a khing a rit deuh " Biachia" dah? Cucu kan nunnak muisam a sersiamtu an si philh hlah usih.