Global Rinpi Group- GRG

(Drafted by Salai Ni Peng Ling)

Vawlei cung hmun ram kipah Pathian nih a kan hruai, a kan phakter cio tikah hi ramkip ah a um mi Rinpi minung hna nih pehtlaihnak kan ngeih lo ahcun kan fale hna chan ahcun Rinpi minung hna kan i kawl kho ti lai lo. Nulepa an nun chung cu pehtlaihnak an ngei kho rih men. Sihmanhsehlaw, chankhat kan liam ahcun kan fale cu Rinpi mi kan si timi an theih tiang lawng kha a si lai. Kan i pehtlaihnak cu a tlau chin thluahmah ko lai.

Cucaah Rinpi minung nih a herh mi cu Global huap in a fek mi pehtlaihnak ngeih khawh ding hi a si. Cucu kanmah hnu in kan fanau hna nih an pehzulh khawh ding mi pehtlaihnak a si a herh. A fel mi le Rinpi kong ah kherhhlainak biatak tein a zoh ii, a dothlattu minung kan um zong a herh. Cu hnu lawngah a fek mi pehtlaihnak kan sersiam khawh lai.

Midang pumpak bia vaivuan menmen in si loin, pumpak hrimhrim in a fek mi tehte (photo, video, data) hna he rian a tuan mi bu kan dirh hmasat a herh. Cu hnu lawngah cu bu nih mipi sinah theihternak, mipi cawlcanghternak a chuahter khawh lai.

Cucaah a herh mi cu bu chungah aa tel ding mi chungtel hna hi a si. Tahchunhnak ah Malaysia thil a cang mi- cu Malaysia ii a um mi chungtel pakhat nih fiang tein a hlathlai dingah tuanvo a ngei lai. Cu bantuk in hmunkip, USA states kip, Australia, Denmark, Norway, Singapore, Kalay, Kanaan, Angteng, Hakha, Rinpi tiin thil sining fiang le tlingte in a dothlat ding mi minung kan um a herh.

Bu a dir ahcun Fund a herh. Fund kan ngeih lai lo caah, chungtel a si mi poah nih kum (5) ca in thlakhat ($2) kan thawh a herh hmasat. Cucu kum (5) caah cun $120 a si. Myanmar kyats (120,000) hi cu thawh lo ngah loin thawh a herh. Cu cungah riantuan hmasat a herh. Kan riantuannak a that hnu in mipi sin zongah fund kan kawl tikah, mipi zong nih tangka in an kan bawmh zungzal lai.

Cu lawng siloin pumpak nih hi riantuannak hluut a duh mi caah innka kan on zungzal lai. Chungtel hna nih kan ngeih mi tinvo cu thil a cang mi thil sining kong fiangte in a theih khawh lai; bia tung dirhnak ruahnak chuahnak nawl a ngei lai; biachah tikah vote peknak nawl a ngei lai. Bawmhnak a herhnak hmun ii pekchanhnak tuah tikah chungtel vialte hna ṭuanvo pek ningin tawlreltu an si kho lai.

Minung zeizat kan si; Lo thlomi chungkhar zeizat kan si; Kum 60 cung minung zeizat; hngakchia zeizat; Sianghngakchia zeizat; sayate zeizat; tibantuk tiangin feltein data kan tuah kho lai. Cu ningin fund kawlnak le bawmhnak te hna tawlrel a si te hnga. Data tuah ning cu hruaitu upa hna nih tha tein timhtuah a si lai tikah riantuan zong a fawi deuh lai. Cuticun vawlei cung Rinpi minung hna nih a fek mi bu kan dirh khawh lai.

TINH MI (OBJECTIVES)

(1) Vawlei cung Rinpi minung vialte sizung a kai mi kan um tikah chungtel bu biachahnak ning zat in bawmhnak pek a si lai.

(2) Kokek harnak ruangah har a tong mi hna sinah chungtel vialte biachah ning zat in bawmhnak pek a si lai.

(3) Tar/Ngakṭah/ cawmtu ngei lo hna bawmhnak kong cu chungtel vialte nih baichah ning zat in bawmhnak a pek lai.

(4) Tanghra a awng mi hna roca le laksawng peknak a tuah lai.

(5) Sianghleiruun a kai mi hna bawmhnak le thazang peknak a tuah lai.

(6) Rinpi nunphung le upat awk a tlak mi kan pupa hna upatpeknak rian a tuan lai.

(7) Rinpi minung chungin mi thiamsang an chuah tikah lawmhpinak le upatnak a tuah lai.

(8) Rinpi khua ram ṭhanchonak le ṭuanvo lak awk thil (issues) kong caihhmainak a tuah lai. Cu ṭuanvo ngeitu sinah ruahnak peknak le cawlcanghnak tawlrelpi hna lai.

BU SERSIAM NING (ORGANIZATION STRUCTURE)

(1) Vawlei cung ramkip ah a um mi Rinpi minung vialte pehtlaihtiaknak bu a si lai i (Global Rinpi Group- GRG) ti a si lai.

(2) Ram kip ah Rinpi khua le phun he aa pehtlai mi minung vialte tel a si lai.

(3) Rianṭuantu Member cu ramkhat le hmunkhat ah minung a tlawmbik pa (1) tel a si lai. 

(4) Cu member hna nih kan umnak hmun kiangkap Rinpi minung vialte thawngpang, thilsining kong chungtel bu sinah thla fatin thawngthanhnak a ngeih lai. 

(5) Cu member hna nih an umnak hmun ii Rinpi minung kong he pehtlai in tuah ding, ṭuan ding mi thil kong member vialte sinah a chuahpi lengmang lai. Cun member vialte nih caih hnu ah ṭuan a si lai.

(6) Hi organization cu Chairman, Secretary le Treasurer, le members tiin ser a si lai.

(7) Bia tung dirh mi le Hot Issue kong he pehtlai in biachah khawh lomi a um lo ahcun Chairman biachahnak in biatlukter a si lai.

CHAIRMAN LE SECRETARY LE TREASURER RIAN

(1) Secretary le Chairman nih zeitindah Fund kan kawl lai timi khua an khaang peng lai. Cucu Chungtel hna sinah lungtlinnak a lak lai. 

(2) Biachiah mi hna nithla he biafunhnak cazin thatein an ngeih lai. 

(3) Member kip sinah a herh mi thawngthanhnak an tuah zungzal lai. Tangka thawhnak kong ah khua khaang lai. 

(4) Tresurer a rian cu tangka kenpiak a si lai. A herhnak hmun Chairman le Secretary nawlpeknak le members vialte lungtlinnak in tangka a kuat lengmang lai. (Treasurer nih Chairman le Secretary le chungtel hna theih loin Fund tangka cu zeiruang hmanh ah a hmang lai lo).

(5) Treasurer nih tangka chuaklut cazin tha tein a tuah lai.

(6) Treasurer nih thla fatin tangka balance kan ngeih mi theihternak report a tuah zungzal lai. (Bank balance, date he photos in a kan kuat zungzal lai) 

CHUNGTEL KONG 

(1) Chungtel hna cu Rinpi minung cungah dawtnak le zawnruahnak a ngei taktak mi an si lai. Cu hna nih thlakhat ah $2 in Fund a thawh lai ii, kum caah ($24) a si lo ah Kawlram tangka MMK. 24,000 in a thawh lengmang lai. Kum (5) caah a si. Kum (5) caah (MMK. 120,000) a si lai. Thlatin/ kum tin zongin pek khawh a si lai ii, kum (5) caah avoikhat te zong in pek khawh a si lai. 

(2) Chungtel (Members) hna nih biatungdirh khawhnak, biaruahnak le biachahnak ah tel khawhnak tinvo an ngei lai. Organization nih rianpek ningin pelh lo tein tuan khawh aa zuam lai.

(3) Amah hmunhma ah Fund kawlnak, tangka khawlhnak te hna te ṭuanvo pek ningin a ṭuan lai. Amah ruahnak lawngin bu min in rian a ṭuan lai lo.

(4) Pekchanh a herh mi an um caan ah bu nih ṭuanvo pek ningin a pekchanh hna lai. 

(5) A hmunhma kiangkap a um mi thawngpang vialte; chambaunak le a herh tiah a ruah mi vialte bu sinah a chuahpi colh zungzal lai. 

(6) A chuah pi tikah bia sawhsawh lawngin a si lai lo. Thawng a theihnak siseh, a hmun ah a kal hnawh lai i, data tha tein a khawmh dih hnu in a chuah pi lai. Zeitluk biapi dah a si timi zong a telh chih zungzal lai.

(7) Chungtel nih a rian nganbik hmasat bik cu a hmunhma a ummi Rinpi minung cazin le data lak ding a si lai.

(8) Minung cazin laak tikah: Min, Kum, Current Address, Phone No., Riantlaih mi, chungkhar status (nuhmei, chungkharpa, nu, sianginn kai lio tibantuk a tel lai. 

(9) Data lak tikah Kum 60 cung mi pazet, Kum 10 tang minung pazet, cawmtungei lo nuhmei pazet, cawmtu ngei lo ngaktah pazet tibantuk pawl an si lai. 

(10) A si khawh ahcun Photo, Video, langhter chih lengmang a si lai. 

GRG- Global Rinpi Group- General Issue

(1) Logo, Official Letter ngeih a si lai. 

(2) Biaknak le Uknak lei tangah a cawlcang mi a si lai lo.

(3) Biaknak lei upa, uknak lei upa hna, mino bu he rian a ṭuanti mi a si lai. 

(4) Biaknak lei upa, uknak lei upa hna rianṭuannak kongah aa thlak lai lo. A herh a ti lawngah bu chungah caihhmai hnu; statements le advisory cathluan a chuah lai ii; ruahnak a pek hna lai. 

(5) Rinpi vawlei le thingkung rampar, tiva hna le pawngkam kilvennak, saram hna kilvennak; kong ah caihhmai ii, midang nih kan ram chungah an duhduh in thil an tuah nakhnga lo hi bu nih uktu lei khuabawi hna he naihniam tein rian a ṭuan lai.

(6) Thilpi pa ruah caih tikah; member pakhat cio in cathluan in ruahnak chuahpi a si lai. Cucu chungtel vialte nih kan rel dih hnu ah Secretary le Chairman nih a tha lai tiah biafunnak an tuah mi cu member sinah theihternak an tuah lai. Cu a tha tiah mitamdeuh biachahnak in rianṭuan a si lai. (Tahchunhnak; Rinpi thingkung hna zohkhenhnak kong; Hmunramri hna zohkhenhnak kong; Thinglung laaknak kong; tibantuk hna an si lai)

(7) Hmun dangdang kan um tikah kan khua le ram kan kilven lo ahcun; midang nih cozah he rianṭuan in an kan chuh lak piak khawh dih mi a si. Cucu zeitindah kan kilven lai timi te hna; ruahnak chuah cio ding; kan umnak hmun cio ii, thil an kilven ning chuah pi cio ding hna a si lai.

(8) Harsatnak tampi lakah Pathian thawngtha in kan nunnak; kan nunphung a thleng hmasat bik tu Pu Tlei Zarh le Pi Ci Caan hna philh lonak upatnak caah thil pakhat tuah kho dingin ruahnak a chuah lai. (Biaknak le tuanti ding). 

Chungtel caah Nominate ka tuah ka duh mi hna;

(1) Rev. Mang Hre (Australia)

(2) Pastor Tial Mang (Norway)

(3) Pastor Cung Hnin (Phai)

(4) Rev. Tum Peng (Kalay)

(5) Pu Tluang Cung (USA)

(6) Pu Chan Ceu (USA)

(7) Pu Robin (USA)

(8) Pu Mang Peng (USA)

(9) Pu Aung Bik (USA)

(10) Pu Sang Nawl (Malaysia)

(11) Pi Bawi Sung (Malaysia)

(12) Pu Hniang Mang (USA)

(13) Pu Thet Khai ( )

(14) Pu Bawi Cung Thang (Angteng)

(15) Val Mang Biak (Hakha)

(16) Val Biak Sang (Rinpi)

(17) Val Bawi Uk Mang (Singapore)

(18) Pi Ngun Nei Par (Denmar)

(19) Pi Ni Sung (Denmark)

(20) Pi Tial Tin Mawi (Falam)

(21) Pu Sui Uk (Hakha)

(22) Pu Siang Bik (Tonzang)

(23) Pu Doi Hniar (Kalay)

(24) Salai Ni Peng Ling (Singapore)

(25) Pu Sui Zaam (Kanaan)

Minung (25) nih kum (5) caah (120,000) cio kan chuahpi khawh ahcun (3,000,000) a chuak lai. 

Ting 30 cu Group Account Bank ah fix deposit in kan chiah ahcun: Kum khat ah 10% a si lai. Kum khat ah ting 3 (300,000) a karh lai. Kum (5) ah ting (15) a karh lai. A dihlak ah ting 45 kan ngei lai. Capital thihter lo in; a karh mi lawng hman dingin tuaktaan a si lai. Caankarlak ah ramleng a um mi sin zong fund kawlnak tete zong in kawl khawh a si te hnga.

Hi a cunglei vialte hi Global Rinpi Group (GRG) a dir khawh nak caah ka ruah khawh tawk a si. 

Upatnak he,

Salai Ni Peng Ling

Singapore