# Tangka tampi a ngei mi na vat/ na thit thawngin na rum kho. Sihmanhsehlaw na pek chanh ding mi cu na duh lem lomi nu/pa he na nunchung hmunkhat ah caan hman ding a si. A man a tlawm hrimhrim lomi a si.
# Midang va hlennak, midang thilchuhnak, ningcang loin thil laknak in na rum kho. Rum le thancho zong a rang ngaingai. Sihmanhsehlaw a man na pek ding mi na thinlung zalennak a man na pek a herh. Zeitikdah thong ka tlak lai timi nih na thinlung an temtawn peng lai. Nangmah le mah cungah upatnak na ngeih mi na sungh a herh. Cu lawng siloin cu bantuk minung hna cu vawlei minung kip nih an huat mi a si. Na rum ko lai, sihmanhsehlaw na rumnak cunglei ah calu (Title) an tar mi aa dang lai. An ka theih sual lai tiin na ngeih chiah thilri/innlo cung hmanh ah lawmhbia na chim ngam lai lo. Cucu na nunchung na pekchanh ding mi a si.
# Na nulepa nih ro an in pek ruangah na rum kho. Lottery poh nak zongin na rum kho. Sihmanhsehlaw tangka tampi tawlrel ning ah fimnak a ngei lomi na si ahcun; " tangka cu sualnak vialte a hram a si" timi phungthluk ah na chuak ko lai. Chikkhat te ah a hlan na dirhmunte na phan than ko lai. Tangka kan i zat lo ii kan lung rethei nakin tangka a hleihluat ngeih i zeitin tawlrel lai theih lo, lungretheih a faak deuh.
# Lamcaang, hlasa thiam, zanglek thiam, muidawh tbk, na sinak thawngin na rum kho thiamthiam. Sihmanhsehlaw a man na pek ding mi cu na pahrang cungah cawnnak na ngeih peng a herh. Zei hmanh tuah mi le timh-cawnnak ngei loin cu bantuk pahrang cu na ngei kho lo. Cu bantuk cu zapi zaraan nih kan si khawh lomi a si.
# Tangka Tawlrel thiamnak thawng zongin na rum kho. Vawlei cung Natural Law pakhat a si mi cu hmuh na duh mi cu pe hmasat. Zun na duh ahcun tuh hmasat, ti hi a si. Sihmanhsehlaw minung tampi nih tuah kan i harh. Minung pakhat na theih bal lomi zong nihnak na pek ahcun na hmuh ding mi cu nihnak a si ve ko lai. Mi pakhat kut-tum na dangh ahcun kut-tum an dangh ve ko lai. Tangka tawlrel thiamnak na ngeih khawh nak ding zongah na pekchanh mi a um a herh. Kum 9, kum 10 chung thla hlawh man ngei lo zongin na um kho. B & I dirhmun na phak khawh nakding ah na caan le leiba he naa ciah caan zong a sau kho men, Sihmanhsehlaw tangka tawlrel a thaim mi na si ahcun nangmah pumpak in Corporation fawi tein na ser khawh lai, na rumnak cu na ruahnak nih a phak leng tiang in a si lai.
# Bill Gate a rumnak cu Microsoft Operating System a ser thiamnak thawngin a si lo. Sihmanhsehlaw Information a lak, cucu amah ngeih in a kilven, kum 30 hrawng a si ah vawlei cung mirum bik ah a cang.
# Aristotel Onassis cu Cargo thil phurhnak lei in mirum a si. Sihmanhsehlaw a hram thok a rak ngeih mi cu catlap lawnglawng a si. Cucu Legal Document a si. Tilawng nganpipi a ngei maw ti ahcun a ngei lo. Sihmanhsehlaw law Cargo ngan pipi in rili cung thil phurhnak khawhnak nawl document a ngei. Tilawng cawknak tangka a ngei maw a ngei lo. Bank ah a cawi. Bank ah an cawi tikah Tilawng cu W.W 2 lio ah US nih an rak khawn mi pawl cawk a ding a si. Asinain US nih phung a ngeih mi cu American Citizen pawl lawng nih cawk a ngah ti a si. Onassis cu Greek citizen a si. Sihmanhsehlaw U.S ah amah control mi corporation pakhat min in a cawk tikah a cawk khawh, cu ti cun vawlei cung ram tampi Cargo thil a phurh khawh ii, mirum ah aa chuah.
# Financial Education kan ngeih ahcun atu na dirhmun/ kan dirhmun te in rum khawhnak lam tampi a um. Sihmanhsehlaw, a chia mi min tangah a si lai lo, na rumnak phuang ngam lo zong in na um lai lo. Financial Education nih aa tinh mi cu " freedom from financial problem" a si. Tangka lei chambau nak chungin zalennak hmuh kha a si. Chim duh mi cu nangmah rian na tuan a herh ti lai lo. Tangka lei tawlrel a thaim mi na si caah, na tangka pawl nih rian an i tuanpiak lai. Na tangka pawl nih an in cawm lai. Tangka caah riantuan mi (tangka ukmi nun) siloin tangka riantuantertu (tangka uktu) nunnak ah na phan kho lai. Cucu tangka tawlrel thiamnak in hmuh khawh a si.
# Roconak, Lottery pohnak, thilfirnak, ningcang loin thillaaknak in hmuh khawh mi a si lo.
Salai Ni Peng Ling
16th Jan 2018
No comments:
Post a Comment