Rumnak le sifahnak tiah ṭial tikah chim duh mi cu tangka lei rumnak le sifahnak hi kan chim duhnak a si. Rumnak le sifahnak nih anmah harnak an ngeih veve. Kan tangka nih kan duhherh mi a kan zalhpiak khawh lo tikah kan lungre a thei. Cu bantukin tangka a hleihluat le tamtuk a ngei mi hna zong nih zeituahnak an thei lo ii an lung a thei ṭhiamṭhiam ve.
Voikhat cu Pu Zul nih a ui co tumpi cu lengah a chuah pi. A uico nih zalam cung ii a kal mi mawtaw hna cu a bauh hna ii, seh a timh hna. Cu lio ah Pi Dar nih, “Pu Zul, na uico cu a ka neng tak ve aw, mawtaw cu ka seh kho lai ti bang a boh hnawh i, seh a timh lengmang ve hnga” tiah a ti. Pu Zul nih, “Kei cu cu kongah ka buai lo eh, kei ka buai mi cu pakhat te khi hei seh hnih seh law, zeidah a tuahnak hnga, ti ka ruat deuh eh” tiah a leh.
Voi tampi ah uico bantuk kan si ve. Rumnak kan duhtuk, kan chunmang le kan zaanmang tiang ah kan hei i manh pi ko nain, tangka thonghtham cawk loin kan pe taktak hna seh law, zeituahnak hmanh a hngal lo ding mi tampi kan um. A kan neektu pawl diriamnak in hei neek ve nak sawhsawh le kan sifah lio kan duh mi kan cawk khawh lo diriamnak menmen in tangka a hmang sawhsawh ding mi kan tam pi.
Rumnak kong ah cawnpiaktu tampi nih an kan cawnpiak ning aa dang cio. Tangka cu sualnak vialte a hrampi a si; mirum cu mi haakkau le sifaak ngakṭah cungah zawnruahnak a ngei lomi an si; mirum vanram kai nakin cun kalauk ṭhimka luh hmanh a fawi deuh lai, tiin cawnpiaktu an um.
Cu tikah minung tampi nih rumnak hi kan hmurka in a chuak ngam lem lo. A cunglei cawnpiaknak bantukin ningcang loin rumnak a kawl mi tampi an um taktak. Mirum an si hna nain, an donghnak aa dawh lomi minung tampi an um. Sihmanhsehlaw vawlei cungah ningcang tein rumnak a kawl mi tampi an um ve. Mirum tampi an um. Cu hna thawngin mi tampi nih rianṭuan awk an ngei. An chungkhar tampi nih nuam tein an nung kho. Mark Zukerberg (facebook) sertu pa cu vawlei cung mirum 5 chungah aa tel ve. Bill Gate vawlei cung mirum bik hi tah; zangfahnak a ngei lomi le mi haak kau maw a si?
Mirum hna hi misual le mi ṭha lo in a hmutu hna thinlung hi a taktak cu ningcang loin, rumnak kawl a duh mi; pekchanhnak tel loin, caan tawi te ah rumnak hmuh a duh mi hna an si.
Rum duh ahcun pek hmasat a herh. Pekchanhnak tel hmasat loin rumnak cu ningcang lo rumnak a si. Minung 100 caah na pekchanh khawh ahcun cu 100 na pekchanh khawh mi he aa tlak mi rumnak cu na hmuh ve lai. Minung millions, billions caah thil ṭha na pekchanh khawh ahcun cu na pekchanh khawh ning in na rum ve ko lai. Henry Ford nih tampi nih man fawite in mawṭaw an hman cio khawh nakhnga aa zuam tikah cu a tuah sernak hee aa tlak mi teinak le hlawhtlinnak cu a hmuh. Bill Gate nih microsoft cu vawlei cung mi tampi nih fawite in kan hman khawh nakhnga aa zuam tikah vawlei cung billionaire ah a chuah. Mack Zukerberg nih mi tampi nih kan hman khawh ding mi, kan i hrawm khawh ding mi facebook a tuah tikah billionaire ah a chuah ve.
Rumnak kan duh tikah minung pakhat caah kan tuah ahcun minung caah kan pekchanh tlukin kan rum ko lai.Kan khua mi vialte hna caah thilṭha kan pekchanh khawh ahcun kan khua dirhmun ningin mirum ah kan i chuah ko lai. Khuapi caah thilṭha kan tuah khawh ahcun khuapi dirhmun tluk in kan rum ve ko lai. Ram pakhat chung ah a um mi vialte caah thilṭha kan pekchanh khawh ahcun ram pakhat dirhmun sining in ka rum ko lai. Vawlei cung minung vialte hna thilṭha kan pekchanh khawh ahcun vawlei cung dirhmun in kan rum ko lai. Pekchanhnak tel loin rum cu ṭih a nung mi a si. Lam tampi in rumnak an kawl cio.
Rum duh ruangah mirum a ṭhi, a va mi hna an um. An duh ruangah aa ṭhive mi an si lo. Cu rumnak caah an pekchanh mi cu an nunchung an duh lomi he khuasak kha a si.
Mi va hlennak, eihmuarnak, phungning lo rianṭuannak in rum khawh a si ve ṭhiamṭhiam. Sihmanhsehlaw ral tampi an i chiah tikah an nun chung hnangamnak an hmu bal lo. Ni khatkhat ah tlaihkhih le thongthlak kan tong te lai ti theih bu tein an nung peng ko.
Pilepu, nulepa mirum an si ruangah na rum kho. Sihmanhsehlaw zeitindah rumnak hi ka kilven lai tmi a tuaktan thiam lomi an si ahcun an rumnak cu sau a khang tawn lo.
Lottery poh nakin zongin na rum kho. Lottery pohnak in a rum mi an rum lan timi a har ngaingai tiah an chim.
Zeicatiah rumnak taktak timi hi tangka tampi ngeihnak ah khin si loin, minung khuaruahnak ṭhawnnak chung tu khin a va deuh. Mirum hna nih cun tangka an ser khawh nakding tangka an herh lo. Tangka um loin, tangka a ser kho tu an si.
-----------
Salai Ni Peng Ling
No comments:
Post a Comment