Kan Bia Chim Mi Thlennak In Kan Nunnak Thleng Usih!

Phungtlukbia (4:23-24)- " Na lung kha veng tuah, zeicatiah cuka cun nunnak cerhti a put. Hrokhrawl bia cu na kaa chungin chuahter hna hlah law, depdetnak bia cu hlawdiam ko hna. "

Minung nih kan hmurka in a chuak bia hi kan i ralrin ngaingai a herh. Kan bia cu sersiam khawhnak thazang a ngei, hrawhkhawhnak thazang a ngei fawn. Kan nunnak cungah biachia lawngte kan chim tikah, kan nunnak nih a donghnak i a zun mi cu chiatnak le sunghnak an si ko lai. Cu bantuk thiamthiam in kan nunnak cungah teinak le bia tha lawng te kan chim tikah, kan nunnak nih zuun mi thluachuahnak le hlawhtlinnak an si. Cu thluachuahnak cu kanmah lawng siloin, kan pawngkam ah a um mi hna zong nih an co ve. 

Kan thinlung chung ah ruahnak tha lo hna hmunhma pe in, kan hmurka in kan chim awk a si lo. Zumh lo nak le lunghrinhnak a khat mi bia tha lo hna cu kan chim awk an si lo. Ruahchannak le lawmhnak a phurtu bia chim kan i thim awk a si. Na chunmang le na hmuh chung mi thil kong hna chim ko. Jesuh thawng in zeizong vialte ka tuah khawh ko tiah, thang piin chim. Teitu ka si tiah chim ko. 

Harnak caan chungah ka um tiah naa ruah tikah, a hmasat bik na ruahnak chungin a rakchuak mi thil kong kha chim rih hlah. Chikkhat te von i din hna law, na intuarnak thinlung daihter i zuam hmasat. Cu na ruahnak hna von fun khawh i zuam than. Thluachuak bia le bia tha hna na hmurka in na chim tikah Pathian nih na ral cu an tei piak lai. Zuamcawhnak na ton mi vialte cung ah hlawhtlinnak an pek lai ii, Amah nih an chiahpiak mi thluachuah vialte zong co ter na si lai. 

# Bia tha lawng chim khawh i zuam.

# Na thinlung hun lio caan ah na ruahnak chungah a chuak hmasat bik mi bia chim hlah.

# Jesuh min in zeizong vialte kan tuah khawh hna, tiah thangpi in chim.

# Bawipa nih na ral an tukpiak lai. 

# Nangmah cu teitu na si lai. Na thawnnak in a si lai lo. Na fimnak in a si lai lo. Na thiamnak in a si lai lo. Pathian thlarau thawngin a si lai. 

"Bawipa, ka pawngkam ah a um mi vialte caah thluachuak mi ka si ter ko. Bawipa kan nunnak caah bia tha lo a chimtertu ding ka Lei uk khawhnak na pek caah nangmah cu kan thangthat. A rem a tha nunnak hmuh awk ah thla kan cam. Kan chim mi biakip hi thluachuah a petu Nangmah na si lai caah, lunglawmhnak he Khrih Jesuh min thla ka cam".

*************************