KHUATLIRTU - DAL (1)NAK

Tu kum cu kum 40 chungah a kik bik kum a si men lai. England ram chung khuate tampi cu hawhra le khua kik ruangah leng hmanh chuak ngam loin an um hna. Nikhat cu January thla chungah a si. Glasgow-London tlanglawng cu Euston tlanglawng dinhmun ah sumilam 24 tlai ah a rak phan. Hawhra le khuadom hna ruangah tlanglawng kalnak zong ṭih a nung ngaingai ko. Mawṭaw in a kal mi denkhawnnak cu voi dang nakin a lethnih an tam deuh. 

Cu khuasik thla a hun dih i thal caan a hunphak cun khua caan a hun i thleng. Mipi hna tlonlen umkal ning zong a hun i dang ve. London khuapi chungah dinhcaan a laa mi ralkap hna cu angki bantawi tete he a um mi nungak hna he an i tuaitam len ko hna. London khuapi cu zohnak ahcun ral a tu cuahmah mi khuapi zong a lo lo. Mipi hna cu hnangam ngai in an um ko. 

Henry Faber cu cycle in Waterboloo in Highgate lei ah a kal cuahmah. Catar mi tete tampi an um len. Aa cinken ning ahcun Inn hmai ah these dip pipi an chiah hna. Suburban dum ah khamnak hauhruang ngan pipi an chiah hna. Chuahluhnak kong catar mi tete zong a hmuh pah hna. Faber nih cubantuk thil tete a zohpah ko hna. Asinain tlanglawng rianṭuantu hna nakin a khua cuanh hi a thuk deuh. Dum chungah hngakchia hna le minung tampi lente an i celh mi a hmuh caah chuahluhnak in kal ding cu a si kho lo tiah a ruah. Lamcung ah a um mi Mawṭaw hna a rel hna. Dum kilvengtu hna an um caah Model thar a si mi mawṭaw a rel mi bantukin an model le an chuahnak company min hna aa relter hna. Cun ti cun rianṭuantu hna cu chun nakin zaan rianṭuan mi hna an hlan nakin an tam deuh tiah a ruah. A taktak ii a ngiat duh mi cu Britain tlanglawng pawng hrawng ii ralkap a um mi thazang hna kha an si. Cun inn a phak in thil sining a hmuh mi pawl cu a thanh lengmang tawn. A ca chungah cun Expeditionary Forces singkhat hrawng cu timh an sinak kong le cucu Finland ram lei kal ding an sinak kong te hna an i tel. 

Biachokvai cu a um ko nain, fiang tein theih khawh a si lo. Radio thawngthanhnak hna in ralthawhnak phung kong hna cu tlerhkhawnnak bantukin capo in an chim hna. Mi tampi nih ralthawh dawh a sinak kong te hna an chim. Asinain thli chung bia vaivuan a si tiin tampi nih zum loin an um ve. 

Sihmanhsehlaw Faber cu midang bantukin siloin phun dang ngai in a hmuh. Amah cu midang nakin mi phun dang deuh a si ruangah a si ko lai. 

Faber cu a cycle in Archway Road lei ah rang deuh in a kal. Hmailei fingbo kai khawhnak dingah a pum cu hmailei ah a kun pah, cun cycle cu Engine set chung piston hna bantuk rang ngai in a lam. A kum zong kum 39 a si ii, a thazang a ṭhawn lio te a si. Sihmanhsehlaw a kumkhua kong zong cu lih a si. A sining a diklak ngawt in lih lawngte a si. A thlanti tla duahmah in fingbo cungah a hung kai ii Highgate lei ah a kal. A umnak cu London khua chung innsang hna umnak ah a si. Cuka thengte ah um ding in zeicadah aa thim hnga? Inn tlaar paruk a donghnak ah “Victoria Brick House” timi inn a um. Inn hna cu an sang ii, an hme fawn. Inn cu basement tel in dotthum an si. Luhchuahnak cu kum tampi Mirang pawl nih an sal hna caah an rak ser mi bantukin an ser hna. Cucu Faber thinlung ahcun atu ah sal an um ti lonain mirang pawl midang sal va ser an duh ning langhtertu a si tiah a ruah. 

Innruknak cu Mr. Harold Garden nih a ngeih mi inn a si. Lakphakti dawr a tuah. Cu lio ah company hme tete rian ṭuan awk an ngei ti hna lo. Leiba ngeih cu minung phung a si ko nain, Mr.Garden cu a leiba a tamtuk caah thihnak dah ti lo cun a leiba cham khawh ding a si ti lo. A ngeihchun a inn cu amah lawng a hnu ah a nung ding mi a nupi sinah a pek tak. Cuticun innhlang chiah ding ah a nupi zong nawl a hun ngei. Inn ngeitu asinak cungah a lungsi ngaingai ko. Asinain innngeitu (Landlady) timi von ti dingah a ningzah a pang ngaingai mi a si. 

Faber cu cuka inn a cungbik ahcun inn a hlang ve. Cuka ahcun cawn nikhat ni in cawn ninga ni tiang lawng a um. Inn ngeitu Mrs Garden a chimh ning ahcun Erith ah zarhte le zarhpi cu ka nu he caan kan hmang tiah a chimh. Asinain a taktak ahcun Faber cu Blackheath ah a dang inn pakhat a hlan mi a um ṭhiamṭhiam. Inn ngeitu cu Mr Baker a si. Mr Baker sinah cun khualtlawng thil zuar ka si caah zarhte le zarhpi lawng hika ah ka um kho tiah a chimh. 

A cycle te cu inn hmai thlalangawng hmai ah a hei nam I, hramh riamnak set cungah tawh in a hrenh. A kiangkap ah Aalu kung tampi an um hna. Mrs Garden nih raltuknak a thawh sual ah tiin a pangpar dum cu Aaloe meh haang cinnak ah a hman hna. 

Faber cu inn chungah a von lut. Mileng khaan luchinh chiahnak ah a luchinh cu a tlai pah. Cun a hmai a phiah. A kutke aa tawl hnu in lakphakti ding ah inn chungah a lut. A dang inn hlang pathum hna cu zanriah an rak ei cang hna. Pakhat cu Yoskire in a ra mi, ralkap luh aa tim mi a si. Pakhat cu sumdawng a si ii, pakhat cu ti ralkap in aa din cang mi pa a si. Faber nih a lu a sukpiak hna ii an pawngah cun a thu. 

Sumdawng pa nih capo a chim hna. An ni pah hna. Culioah inn ngeitu Mrs Garden cu a rak lut ii, “Mr. Faber, zanriah kan in ei tak chung, na thin hung hlah mu”tiah a ti. 

Faber cu zanriah timhpiak mi duhsah tein a hun ei pah in “Na aalu cinthlaak mi hna cu an ṭhang ngai cang” tiah a hei ti. 

Faber cu a dang pawl capo chim in an nih lio ah a lakphakti rianrang deuh in a ding. Cun Chamberlain hmunhma ah Churchill a kai ding a si tibantuk ramkhel kong te hna an i caih len hna. Mrs Garden cu biachim zuam ngai mi a si ii, a aw thang nawn in a hmuh ning a hun chim pah in, lungtlinpitu dingah ti phun in Faber cu a hei zoh. Mrs Garden cu a thau pah mi le a mithmai duh nung deuh lo pawl cu a si ve. Asinain Faber he khupṭhi hrawnghrang cu si dawh an si. Faber nih a ka lem pah ko hi ta a ruat i an biaruahnak in chuah tak hna lawng a duh. 

Cu lio ah Mrs Garden nih Radio a hun on. Radio aw cu zeithawng hmanh thang loin din nawn tein khuai vai thawng bantuk a hung thang. Cun tlawmpal ah “ BBC Home Service in a si. Atu tan zong amah pa kong ṭhiamṭhiam a si ko” an chim. “Amahpa” tiah an duh mi cu German Spy Funf kha an chim duh mi a si. Faber cu ka ihnak khaan ah kan kaltak hna lai tiah a kal. 

Cun tilawmg ralbawi hlun pa cu a lengah sumdawng pa he an chuak. Cun Yorkshire in a ra mi pa te cu biaknak lei ah aa pumpe mi a si caah a ihnak khaan ah kal in thla a cam ve. Mrs Garden cu amah lawng a tang. Cuticun Gin timi zu hrai aa tlaih pah in amah te lawngin inn khaan chungah a ṭhu. Sullam ngei lo ngai in, thlalang awng lei cu a zoh ii, Mr. Faber kong a ruat. Mrs Garden nih cun a ihnak khaan ah kal loin ka dinpi seh, ka um pi seh ti a duh. 

Cubantuk a ruah dih in amah le mah lungthiang lo bantukin a um. Lungthiannak caah tiin a vapa Harold Garden kong ruah khawh a hun i zuam ṭhan. A va cu pumrua ṭha tuk a si lo nain, midawt a thiam ning, mipi sinah a chuak tuk lomi le mi dai a si nak le an rak tlonlenti lio hna cu a hluntuk cang mi film pakhat zoh bantukin a hmuh ṭhan hna. Cun a zu cu a dang hraikhat a hun thlen ṭhan. 

Mr. Faber cu midai te a si. Cucu Mrs Garden caah a harnak pakhat a si. Ziaza ṭha lo zong ngeih dawh a si lo. Kuak zong a zu lo. Zanlei fatin a ihnak khaan ah amah te lawng Radio in hla an thlah mi te cu ngai pah in caan a hmang tawn. Thawngzamh ca tam pi aa cawk i a rel tawn. Cun lamlen a chuah tikah caan sau pipi a rau tawn. A rian cu thil hmetuai a si ko nain, mifim sang a si lai tiah a zumh. Mileng khaan chung ii bia an I ruah caan zongah midang nakin thuk deuh in khua a ruat kho ii, bia a chim kho deuh tawn. A zuam ahcun hi nakin rianṭha deuh a um hrimhrim ko lai. Asinain amah tein cubantuk rian sang hna cu ṭuan dingah kaa tlaak lo ti phun ruat seh law a lo,inn ngeitu nu nih cun a ruah. 

Cun a pum rua umtu ning zoh tikah pumrua ṭha a si. A khabe ruh sau piin a um. A mit cu muici rong a si. A liang titsa, a pheitan le a kenghrawng hna zoh tikah muidawh paza ngaingai a si. Movie chung lamcang dawh tluk cu a si lo nain, a muisam le umtu hoiher ah nungak hna nih duh phun mui a keng mi a si. Asinain thinhun ahcun zeipoah tuah ngamh mi mui hmel a keng. Sihmanhsehlaw, Mrs Garden nih cun ka in khawh ko lai tiin, amah te lawngin bia cu aa el lengmang.

Mrs Garden nih a hmuhka ah a ngiat mi cu mi a zoh tikah zeitik hmanh ah voi hnih a zoh bal hna lo. Hawikom a rem lo mi zong a lo. Cun a tawhrolh le a thil hna aa taih bal lo. Mrs Garden nih cun keimah nih taihpiak ning law, tiin amah te lawng khua za cu a ruat len ko. Asinain Faber nih zeitik hmanh ah ka taihpiak tiah a fial bal fawn lo. Ruahkaw angki fual le hmaizum luchinh chinh in a leng ah a chuak lengmang ko. Khabe hmul a ngei lo. A sam zong tawite te in aa met. Zeihmanh a biapi ah a ruah mi um hlah seh law a lo ko. 

Asinain nupi a herh ti cu a fiang tiah Mrs Garden nih cun a ruah. Asinain amah lawng a um peng mi hi nu duh loin, patu a duh mi phun maw a si hnga? tiah a lung a thur pah. Asinain cu ruahnak cu a ruahnak chungin a ran nakin a kal ter ii, nupi a herh. Tinh mi ngei tein, lam a hruai kho tu, a bawm kho tu nupi a herh tiah Mrs Garden nih cun a ruah. 

Asinain cubantuk leikap in a cawl cangh bal lo tikah Mrs Garden cu a ing a puang ngaingai tawn. Cun a zu hrai chungah zu a hun I tlen pah in, a hmai ah a um mi thlalang cu aa zoh. Pa pawl nih duh awktlak ka si rih ko mi tiin amah le mah cu a pumrua le a muihmel cu aa zoh. 

A zu hrai ne cu a hun cauh. Cun keimah nih ka thok hnga maw tiin a von ruat. Asinain Mr Faber cu nizah pangtuk a si. Asinain pa sinak ngei lo cu a si lai lo tiah a ruah. Cuticun ka zan ihnak thil puan ah a pawngah ka um ahcun aa sum kho bal lai lo, tiah a ruahnak a hun thawn ter. Ka leem chih ko nain rak duh hlah seh law, zeidah a cang lai? Keimah ka ning a zak lai. Asinain mizeihmanh nih an theih lo ahcun zeidah a poi. 

A ke cu duhsah tein a hun thlir. Ihcaan a za cang. Atu hraikhat hrawng ka din ahcun kaa hngilh kho cang ko lai tiin, a dang thol khat cu a va lak ṭhan. A ihnak khaan cu Mr. Faber ihnak tang dot ah a si. Mr. Faber nih Radio a phunh mi thawng cu a ngaih pah in a thil cu aa phoih hna. Cun pink color a si mi zan ihnak thuam cu aa hruk. Mr. Faber a taklawng in um seh law zeitindah a um hnga ti hna ruat. Paw dep nawn tein a um lai. Cun a hnuk lu pawng tete ah hmul tete an um lai. A derpah caah a hnakruh hna cu a lang pah lai. A tai zawn cu hme nawn te in a um bak. “Aish.!...”zei le zei hme ka ruah, cu tluk ka ningzah theih lo cu tiah a ruat ṭhan. 

A ihnak ah zu cu a din pah in cauk pakhat a lak i a rel. A sinain caa fang zoh aa harh ngaingai. A rit lawng siloin a thinlung ah nupa tuahduhnak thinlung in a khat. A donghnak a zu hrai cu aa cauh ṭhan ii, Mr Faber a radio phit hram seh tiah a ruat. 

Keimah zong nih rak ka phihpiak tiah ka va chimh khawh ko cu ta, tiah a ruahpah in a pawng i suimilam cu a hei zoh. Suimilam 10p.m a luan cang. Cun a zan ihnak thuam thil he a tho ii, a sam tlawmpal a von i hriat. Pangpar dawh zeltuang ah a tla mi bantukin a kedenh cu hruk in Faber ihnak khaan lei ahcun a kal. 

A kal pah in amah le mah cu “tar hruut! Faber sin kal ding ah a ruang naa kawlter mi a si” tiah a ti pah. Cun a ruahnak a hun thlen ṭhan. Ziah ka inn pei a si ko cu—cun ka nungak lio ah midang he a sual ṭi bal zong ka si lo. Cun hngakchia zong ka ti si lo. Pa cu ka herh. Keimah cungah a um ding mi, ka hnuk hna tonghpiak ding, ka phei hna muai piak in, faak nawn in a ka hrek kho kho tu ding pasal ṭha ka herh. Atu lio ram kip in ral an tho. Thaizing maw, kiptuh maw, German lei in bomh a tla kho ii, mi vialte kan thi kho. Ahodah chim kho?. Caan ka ngeih mi hna zong ka sung sual lai, tiah a ruah pah in, ihnak khaan cun a chuak. Innleng ah ahohmanh an um lo. 

Mr. Faber ihnak khaan lei ah cun a hung kai. Innka cu a nam nain a chunglei in aa hrenh. Cun innka cu a kingh. “Mr. Faber ”tiah a auh. “Ka um ko” tiah a leh. Mrs Garden cu a tha a nuam ngaingai. Bia chim ding mi kan ngei, innka na ka ong kho lai maw? tiah a ti. Mr Faber nih “ Tak lawngin ka um, chikkhat te” tiah a ti. A cu tak lawng um cu keimah zong zan ihnak thuam lawng he ka si ko cu ta tiin, tawh hlei a ngeih mi in innka cu a on.

Mr Faber cu a kut chungah a zummi naam I put in innka pawngah a dir. Angki chung aa hruk lo. Bawngbi cu aa hruk. A mithmai cu tihnak in aa khat. Muithla ṭih in mithmai a ṭil mi a lo. Zeiruangah cutluk cun Faber cu a thin a phan hnga? 

Mrs Garden nih innka cu a hun. Cun inn chungah a luhpah in a hnu lei in innka cu a hrenh. Asinain zeihmanh chim awk thei loin, ar ko in a um. Faber cu duhsah tein a sin ah a hei kal. Angki aa hruk lo caah a hnuklu pawngah hmul tete cu an um taktak. Duhsah tein Faber sinah a hei kal. Faber nih a hun kuh. Cu a hun hnamh. Mrs Garden cu duhsah tein a mit aa chinh. Culioah ruah lo piin a kenglei in thilzum pakhat khat nih a sawh. A fah a celh lo caah a hraam.

Mr Faber nih hleika ii a rak kai thawng a theih ko. Cabuai cung ii Radio in thawngthanhnak set le code book hna a fiim manh hlan ah rak lut hlah seh law, Mrs Garden cu a thi hnga lo. Sihmanhsehlaw cabuai cunah thawngthanhnak set le biathli lehnak cauk cu a fiim manh hna lo. 

Faber nih a kiu thawng a than lai a phan caah a hrom in a tlaih chih. A naam zum cu a phawi ii, donghter lawlaw a herh caah voikhat a sawh chap. Asinain a rak cawl caah a hnaakruh karlak ah a naam cu aa taap. Thisen hna cu an tla thluamah. Thisen tamtuk a chuah caah a thlithup in tuah awk a ṭha ti lo timi cu Faber nih a hun I fiang. Zeitin a si poah ah, Faber cu German Spy a si timi an theih lo ding kha a biapi mi a si cang. Chikkhat te ah a ruah colh mi cu Mrs Garden hi a tlaihhrem ii, a duh lo caah a rak thah tiin England palik hna nih an hmuh khawhnak dingin tuah a hau cang.

Cucaah Mrs.Garden ruak cu a ihkhun cungah a thlim. A zan ihnak thuam cu a kau ii, chunghn nawh aa hruk mi cu a thleh hramhram. Cu aa fian mi cu Mrs Garden hi nupa sinak tuahduh ruah sawhsawh ah ka sinah a ra mi pei si ko hi timi aa fiang. Cun tlaihhrem hnu ah thah mi bantuk in Mrs. Garden a sam hna bua pah dingin a tuah. Cun a nu thilri cu a kut a purh. Cun a zan ihnak hni cu I hlim pah buin a ruak cu a chiah. Cun ti kholhnak khaan ah a kal. Thlalang aa zoh. Amahlemah lungsi lo ngai in “Mithat pa” a chim ii, thlalang cu a khuai dih. Cu nih cun a thin a damter deuh. Atu cu zeidah ka tuah awk a si ti a hngalh. 

A kut aa ṭawl. A hmai a phiah. A kam aa fawp dih in thawngthanhnak cu a peh colh. Thawng a thanh cuahmah lio ah hi thil a caan caah a dihlak in a thanh manh lo. A biapi mi cu “Finland ram kal ding ralkap” tampi timhtuah a sinak kong kha a si. Cun adonhnak ah a min a thut. “Willi Sinah” tiah a ṭial. 

Cu Faber cu minit pakhat chung ah thil vialte a timhtuah dih. Thawngthanhnak set cu ṭha tein a fim. Cun a donghnak ah Mrs Garden ruak cu a zoh. A thinlung ah a lung ṭha lo. Asinain atu lio cu raltuk lio a si. A fawinak in kei German kan si. England cu ka ral an si. Ka thah lo ahcun keimah thihnak tiang a phakter khotu a si, tiah lung hnemhnak khua a ruat. 

A thilri hna cu Highgate Wood khua ii tlanglawng pawngah a vachiah a hau. Cun thaizing zanlei in Blackheath ah a kal a herh cang. Tuzan cu zeitin a si hmanh ah inn leng ah riah a hau ko. Tlawmpal te cu palik nih a kan tlaih sual lai timi a thin a phang pah ko. 

Highgate ahcun midai te, kuakzu lo, zudin thiam lo, mi sawhsawh thilzuar asinain, Blackheath ahcun tangka ngei, zu, nungak he, neck-tie ṭhaṭha hrukin a um mi Faber sinak in a um. Cuticun midang nih thei thiam lo dingin minung pakhat, nunnak sining pahnih in a rak nung mi a si. 

Zinglei suimilam pakhat a tling cang. Faber cu ihnak khaan chungah thil ṭha tein a chek ta. A kut neh te hna a umnak a um sual hnga maw timi ṭha tein a zoh ta ṭhan. Cun a suitcase cu a lak ii, duhsa tein inn tang ah a ṭum.

Original Writer : Ken Follett - Eye Of Needle 

Dal (2)nak Pehthan te ding>>>