Hope Blood Donor Organization

Hope Blood Donor Organization cu Pu Cung Hu nih kum 2004 ah a rak dirh mi thihlutnak bu a si. Kum 2004 in tukum 2017 tiang pehzulh in rian an ṭuan zungzal. 
Chinram chungah Blood Bank (Thisen chiahnak) kan ngeih lo caah minung in kawl lengmang a si tawn. A caan ah mizaw nih thi a herh lio ah thi hmuh khawh lo ruangah thih cu loin a thi mi minung tampi kan um. Cucaah suimilam 24 chung mizaw zual mi le thihlut a herh mi an um sual ahcun timhcia siding in hi rian cu an thoknak a si.


Thihlutu ding minung hetchet tiah an kawl. Thihlutu hna zong an ngandamnak caah an ti khawhtawk in eidin an pek hna. 

Chin ram chungah thisen an pek cang mi hna hi khua 166 an si cang. Mizaw thirawnh ding an tawlrelpiak cang mi hna hi minung 3063 an si. Hi thihrawnh a herh mi hna chung hin denkhawnsualnak ruangah thi a herh mi, nau ngeihnak ah thisa nih a tlinh lo ruangah thihlut a herh mi, thireu mi le a dangdang ruangah operation tuah a herh ii, thisen a herh mi hna hi an bawmh bik hna. 

A cunglei an bawmhnak mi hna minung caah thisen a hlutu hi minung 3846 an si cang. Ralrin (reserved) ah timhcia in an I chiah mi minung hi 1755 an si. Minung pakhat pum chungah thisen hi 4.7 liters in 5.5 liters tiah a um tiah thiamsang hna nih a ti. 

Thisen an tuaktanpiak mi chungah a tambik an pek mi cu Lian Ceu Hmung (kum 7) a si. Thisen thol 39 an rawnh. 

Hi HBDO nih thisen hlutnak lei lawng siloin khuate lei in midam lo a ra mi, miharsa hna sinah phaisa le, facang le a dangdang eidin an bawmh tawn hna. 

Siibawi nih an lungdongh hnu ah innlei an tinpi mi mizaw hna caah Oxygen zong an tuaktanpiak hna. 
Ruakfimtu a ngei lomi hna zong an ruak an fim hna. Zohkhenhtu ṭhiṭha a ngei lomi hna zong anmah nih an zohkhenh hna. 

Nihin tiangah ruakfimtu ngei lo minung 5 ruak an fim cang hna. Minung pakhat ruak tawlrelnak caah MMK. 450,000 an dih. Minung 5 caah MMK. 2,050,000 an dih cang. 

Hope Blood Donor Oraganization (Hakha) cu Chin ramkawmh, Hakha khualipi hram bunh mi a si nain, Falam, Thantlang, Kalay, Mandalay, Rangon lei ah mizaw zual kalpi a herh mi le tlunpi a herh mi an um tikah an bawmh hna ii an tlunkalnak an bawmh hna. Kum khat ah minung 500 hrawng hi an don, an thlah hna. Atu tiangah minung 20,000 leng an bawmh cang hna.

Zawtnak faak a tuar ii, phasia lei in tlamtling lomi minung hna zong ah phaisa in an bawmh hna. Cu an bawmh mi hna chung ah tambik an bawmh mi hna cu:
(a) Nu Sui Hlei Par (kum 24) – Leitak-A khua a si. Hakha ah aa thlop, a dam khawh lo caaah Mandalay sizung ah an ṭhial. A hngakchiat te in ngakṭah a si. Miharsa a si. A dam lonak hi thluak lei he aa pehtlai mi a si. A zate in an bawmh mi cu MMK. 5,300,000 (ting 53) a si.

(b) Cun Pa Tluang Hnin Thang (kum 19) – Malsawm zong hi a dam khawh lo caah Mandalay ah an kalpi. Cun Yangon an ṭhial ṭhan. Anih hi denkhawnnak in a si. Mawtaw nih a pah sual ii a ke kehlei kam an tanpiak. Thlopbulnak ding an chungkhar nih an I tawlrel khawh lo caah HBDO nih MMK. 3,500,000 (ting 35) an bawmh.

(c) A dang an bawmh mi tampi an um nain hi pahnih lawng hi kan langhter rih lai.

Hope Blood Donor Organization (Hakha) nih hmailei ah ṭhachin in le hmualngei tein rian an ṭuan khawh nakding ah Inn pakhat sak dingin timhtuahnak an ngei. Inn hmun caah Chinram cozah nih an timhtuahpiak cang hna. A hmun cu Hakha khuathar lonh furlung 7 kalnak hmun ah a si.

Cu Inn cu Hope Blood Donor Organization (Hakha) Rescue Center tiah min an sak. Khuate lei in a ra mi mizaw hna tawlrelnak caah le zohkhenhtu ngei lo midam lomi mizaw hna caah siseh, caansau zawtnak a ingtuarmi hna zohkhenhnak caah siseh, kum upa tar zohkhenhtu ngei lo zohkhenhnak caah siseh timhtuah mi inn a si.

Hope Blood Donor Organization (Hakha) cu pumpak ngeih mi siloin minung thazaang tampi I bawm in a cawlcang mi a si. Ramchung ramleng in HBDO rianṭuannak caah mah le ti khawh tawk cio in pek chanh khawh I zuam cio dingin kan in sawm hna.

Ram chungmi caah thlakhat (1000) in kum (3) chung hi riantuannak ah na bawmhnak thawngin nunnak tampi na khamh khawh ii, harsa mi hna tampi na bawmh khawh hna. Lungdong mi tampi hnangamnak na pek khawh hna.

Ramleng a um mi hna nih thlakhat ah ($1) in kum (3) caah ($36) na pek khawhnak thawngin mi tampi nunnak khamh khawh ii, harsa mi tampi na bawmh khawh hna, lungdong mi tampi hnangamnak na pek khawh hna.

Na caah thilrit pek ding cu kan duh lo. Thlakhat ah lakphakti na dinnak ding voikhat man tluk te hi thazang na chuah khawh ahcun tlawmte a si zong ah hi riantuannak caah tampi ṭhathnemnak an ngei mi a si.

Hi rianṭuannak caah USA, Norway, Denmark, Germany le Myanmar ram chungin Chin miphun hna nih an dirkamh ii rian a ṭuan kho mi a si.

Rianṭuannak hi Singapore a um Chin miphun vialte nih ṭanla cio ve usih law, thla khat ah ($1) thawh cio in, kan kiangkap hawikom hna sin zongah hlut a duh mi an um ahcun chim cio hna usih tiah kan in sawm hna.

Singapore Ṭuanvo Ngeitu
Salai Ni Peng Ling
HP: 9091 8905
Email: salai.nipeng@gmail.com
Paypal: www.paypal.me/PengNi
POSB Savings : 133-25227-4



HBDO Director
Pu Cung Hu
Email: cunghu2007@gmail.com
Tel. 070-21558
Mobile.09-400305298