Federal Uknak Tangah Rammi Pakhat Nikhat Chung Nun Ning

American ram, Indiana State, Monroe County, Bloomington ah ka um. Monroe County ah Monroe County cozah a um. Monroe County chungah a dangte in aa uk mi Bloomington khuapi a um. Bloomington le Monroe cungah Indiana State cozah a um. Indiana state cungah United State of America Federal cozah a um.

Monroe county chung Bloomington khuapi ah inn pakhat ka ngei. Cu inn cu Property Law ningin ka ngeih mi a si. Cu Property Law cu Indiana State cozah nih a tuahmi a si nain, Monroe county cozah nih a tawlrel mi a si. Ka inn cu Monroe county khuahrialkap te ah a um mi a si. Indiana state hluttaw nih a tuah mi pawngkam kilvennak phung pawl cu ka zulh hna. Property ngunkhuai cu Monroe County cozah sinah ka pek. Cu ka pekmi ngunkhuai cu Monroe County cozah nih sianginn caah an hman. Cu ka inn chungah ka um peng ii a leng ah ka chuah lo ahcun America Federal Government phunghram nih a ka uknak pakhat hmanh a um hnga lo.

Asinain ka umnak inn in chuah ka herh. Zingka ka fale hna sianginn ah mawtaw in ka thlah hna. Ka zulh mi lam cu Monroe County cozah a sermi le a tawlrel mi zalam an si. Ka fale sianginn an phan cang. Cu sianginn cu ngunkhuai ka pekmi tangka in cozah nih an nuntermi a si. Ka fale fimcawnnak he pehtlai in nawlngeihnak vialte cu sianguk saya le cachimtu hna sinah a um. Sianginn calender ( sianginn on caan, khar caan, dinh caan tbk.,..)hna cu Indiana state cozah nih a tawlrel mi a si. Hi tiangah hin Federal cozah riantuannak le nawlngeihnak chungah ka um tuk rih lo. 

Ka fale sianginn ka thlah dih hna in cakuatnak zungah ka kal. Cakuatnak zung cu United State of America nih a tlaih mi a si. Cu riantuannak cu Federal cozah le private karlak ah hnathlaknak tuah ningin rian a tuan mi a si. Cucaah cakuatnak zung ii riantuannak hna tamdeuh cu Federal cozah nih rian a pekmi hna an si lo. Thilkuat ding hna cu ka kuat dih in ramleng chuahnak passport a thar thlen dingah ka kal. Indiana state cozah cu cakuatnak le ramleng kong he aa pehtlaimi rian he an i pehtlai lo. Cuticun passport thlennak cu cakuatnak zungin Federal cozah sinah ka tuah mi a si. Nihin chung ni tlak ah Federal cozah he pehtlai in ka umnak hi cuka zawn te lawngah cun a si. 

Atu cu Bloomington khuapi in Indiana state ah sianghleiruun ah mawtaw mawngh in ka kal. Monroe County ii Recycling Center pawng ka phan. Cuka ahcun hmunthur pawl ka hlonh pah. Mawtaw maawngh pahin phung ka buar ahcun Monroe County palik pawl nih an ka tlaih ding a si. Asinain Bloomington khuapi chungah ka phung ka buar ahcun Bloomington palik pawl nih an ka tlaih ding a si. Anmah nih Indiana state hluttaw nih phung an tuah ningin taza an ka cuai ding a si.Federal zocah nih cun ritsi vai zuarnak, ramkhellei hnawhthuh eihmuarnak pawl tibantuk tete lawng an tawlrel. 

Indiana sianghleiruun Law Department ah Professor ka si. Indiana state chungah a ngan bik mi sianghleiruun cu Indiana State cozah nih a ngeih mi a si. A phung ningin sianghleiruun he a pehtlai mi phungphai pawl cu Indiana State cozah nih a tuah ding a si nain, a tawlrelnak cu tlawmpal te lawng a si. Indiana State cozah nih sianginnruun thithruainak le tawlrelnak vialte cu Faculty le sianghleiruun uk sinah nawlngeihnak a chiah. Cu sianghleiruun ah cun sianghleiruun nih a ngeih mi palik pawl an dang tein an i ngeih rih. Indiana state cozah nih sianghleiruun cu phungphai ningin cun a hruai ding a si nain, tangka lei bawmhnak lei lawngah a papek deuh. Culak ah Law Department cu schoool fee cu amahte in a leng mi pumpak sinah bawmhhalnak a tuah ii a cawlcangh caah Indiana state cozah nih nawl a ngeih khawhnak ding hi a har ngai. Amah tein dirkhawhnak thazang a ngei.

Law sianghleiruun ah Faculty chungtel hna nih sianginn dum chung zulhphung te hna an timhtuah. Indiana Law Department cu ka nunnak ii a biapi bik mi ka cozah pakhat a si. Cu ti cun ka umnak nih ka lung zong a ka nuamhter ngaingai. Keimah ruahning ahcun State cozah le phungphai a tuahtu hna nih kan cungah nawlngeihnak tamtuk an ngeih awk a si lo timi hi a si. 

.

Zanlei cu sianginn ah ka fale ka va don hna. Cun ka nupi he kan chungkhar rual in zanriah kan ngei hna. Kan einak rawldawr cu Indiana state cozah sin in license a hmu mi a si. Cucaah state cozah nih an dawr mi rawl pawl cu ngandamnak he aa tlak maw, tlak lo an rak chek lengmang tawn. Cu rawldawr chungah kuakzuk a ngah lo. Bloomington khuapi chungah zapi tlonlennak hmun hna ah kuakzuk ngah lo tiin phungphai an tuah ruangah a si. Rawl thaw tein kan ei hnu ah inn ah kan tin ii kan i din hna. 

.

Nikhat chungah Federal cozah (ram pumpi huap cozah), Indiana state cozah (ramkomh cozah), Monroe county cozah, Bloomington cozah le Indiana state sianghleiruun cozah hna nih an tuah mi phungphai tangah ka um kal. A fawinak in cun phungphai zulhnak, tawlrelnak le phungphai chungah umkalnak le biacaihnak kong te hna fiangte in an um cio caah cozah pakhat cio siseh, mipi pakhat caah siseh, zeidah tuah dingin an si, zeidah tuah lo ding an si timi theih khawh a si. Cun cozah pakhat le pakhat nawlngeihnak le an rian chungah hnursuannak um lo dingin an i ralring cio ve. 

.

Federal system chungah ka um caah thil pakhat khat a caan sual ahcun zei cozah sinah theihternak ka tuah lai timi fiangte in ka theih. Thahnawnnak, thilfirnak tibantuk ka hmuh sual ahcun Monroe county palik sinah thawngthanh ding a si. Bianabia ah Law sianghleiruun ah pakhat khat tuah ka duh ahcun Law Faculty member pakhat khat sinah thawngthanhnak ka tuah ding a si. Keimah he aa naih bik a um cozah he kan i pehtlaih bik timi hika zawn hin a fiang. 

Federal system hi uknak phungtha a si. Asinain a tlamtling khitkhet mi uknak phunghram timi cu a um kho lo. Asinain Federal system chungah tuanvo laknak, tuanvo innak, phungphai zulhnak vialte a um dih caah uknak phungtha pakhat a si. Tha a dam. Lung a hnok lo. 

.

Hihi American ram chungah Federal uknak phung tangah a ummi rammi pakhat nih nikhat chung a nunnak umkal ning a si. Nikhat ah a tlawmbik cozah pa(3) asiloah cozah pa (4) phungphai tangah cawlcangh le nun a si. 

(Theihternak: Dr. Andrew Ngun Cung Lian nih kum 1996 in 2007 tiang a ca chimtu Prof.David C. Williams nih a chimh mi hna cu Burma ca in a facebook ah a tar ii, Laica in keimah Salai Ni Peng Ling nih ka leh mi a si)

Credit to: Salai Ngun Cung Lian (https://www.facebook.com/nclian)