RINPI khua cu Latitude: 22 degree, 46 minutes le Longtitude : 93 degree, 46 minutes ah a um. Altitude 1056 ah a um mi tlang cung khua pakhat a si. (RINPI tiah ka hman lai. Zeicatiah Official in kan hmanmi min cu RINPI a si rih caah ka zulh ve lai)
Kan Pu Ral Thang hrinsor fale nih kan khua Rinpi hi an toh tikah "HMUNHLIPI" tiah min an sak. Hmunhlipi cu : -
(1) Hmun - Pu Ral Thang le a fale rual an i tonnak hmun.
(2) Hli - Nu hmasat hrin kan si tinak caah a si.
(3)Pi - Simpi khua in a rami kan si tinak caah a si.
Cu hnu ah HMUNHLIPI cu ṭio tak a si hnu ah an fuh ṭhan ii "RIIMPI" timi aw-cawi in min an pek. Sihmangsehlaw cu chan lio ah ca kan ngeih lo caah kan khua min kong ṭial mi a um lo. Mirang nih an kan uk tikah mirang aw-cawi cu Riim cu "Rim" tiah an tial.
"Riimpi" timi hi kan pupa hna nih an i sakmi maw a si. Midang nih an sakmi dah a si timi theihfian a si lo. Zei sullam in dah an sak timi zong theihfian a si lo. Cheukhat nih Hngalhriang buin kan chuak ii, holh zong thiam loin "riim..riim…rim…" ti mi lawng an thiam caah Riimpi tiah midang nih an auh hna an ti.
A cheu nih a si lo, an vahnak ah Ngalhriang bu an pah ii, Ngalhriang cu "riim..riim..riim.." tiah an thli hna, cu hmun cu RIIMPI tiah an sak an ti.
Cheukhat nih Riimpi hi mi khua ah kal in mi an that. Mi riim an si, tiah midang nih "Riimpi" tiah an ti hna a ti mi zong an um.
Wunna Kyaw Htin Pu Ngun To nih cun "Pu Zo Kaar nih khua a tlak ṭhan tikah tikhingring aw te a theih ii, Riimpi" tiah min a sak tiah a ṭial.
Cheukhat nih "Vacung in paduh, nupi cungin nuduh kha Riim tiah hman a si, asinain Riimpi nih khua an kal taak hnu in khua an luh ṭhan caah Riimpi tiah hman mi a si an ti" tiah an ti.
"RIIMPI" timi a sullam taktak le ahonih a sak timi ahohmanh nih fiangin theih a si lo.(Myth tuanbia mang in a phunphun in an sim cio) .
RIIMPI timi hi kan pupa nih ca in a ṭial tak mi a si lo. Mirang nih anmah aw-cawi in "RIIMPI" cu " RIMPI" tiah an kan ṭial mi a si. Miphun dang nih an kan ṭial mi a si.
Mirang chan lio Lai khua min an kan tialning
Lai caa kan ngeihning zong hi ruahchiah a herh. Min ṭial kong ca he aa peh tlai mi a si. Chin miphun nih Laica kan ngeih ning langhter ka duh.
Lai miphun nih kum 1894 hlan ca kan ngei lo. Chin miphun ah caa kan ngeih ning cu a tanglei bantukin a si.
Miphun ca – A remtu – kum
1. Thado Kuki Chin - Lt. Steward Hudson - 1857
2. Lai Pian (Teddim) - Pau Cin Hau - 1860
3. Asho - Rev. Steven - 1865
4. Lushai - Thomas Herbert Lwein- 1874
5. Siyin - Mr. Rundal - 1894
6. Hakha - A.G.E. Newland - 1894
7. Mara - R.A. Lorrain - 1907
8. Falam - Rev. J.H. Herbert Cope- 1910
9. Tedim - Rev. J.H. Herbert Cope- 1910
10. K’Cho (Mindat) - Rev. N. Adson - 1929
11. Khumi - E.W. Francis - 1930
12. Zotung - Paw Khua mying - 1933
13. Lemi - U Aung Bawi - 1930
14. Matu - Rev. Johnson & Ngai Tim- 1954
15. Dai - Ms. Helga So Hartmann- 1976
Lai miphun cu kum 1894 Major Newland nih Lai caa a kan serpiak hnu lawngin Lai caa a ngei mi kan si. Hi nih a langter mi cu RIIMPI tiah kan pupa nih ca an ṭial ta bal lo timi hi a si. Mirang Tuck & Carey nih Chin miphun tuanbia an ṭial tikah kan khua min cu mirang awcawi in "RIMPI" tiah an kan tial.
Fiarti cu "Firthi" tiah an tial.
Zokhua cu "Yokwa" tiah an tial.
Hakha cu "Hakka" tiah an tial.
Thantlang cu "Thlantlang" tiah an tial.
Hnaring cu "Naring" tiah an ṭial.
Ruavan cu "Rawvan" tiah an ṭial.
Surkhua cu "Shurkwa" tiah an tial.
Simpi cu "Shimpi" tiah an tial.
Hmunhlipi cu "Munhlipi" tiah an ṭial.
Cuticun kan khua min zong mirang chanchung vialte "Rimpi" tiah mirang nih an kan ṭial. Kanmah nih kan i tial bal lo. Cu lio ah caṭial kho kan um lo. Asinain ka khua min kan chim tikah " Riimpi " tiah kan tial.
Cuticun kan uknak le kan chan ning an kan thlen tikah kan min ṭial mi tete zong aa thleng ve. Pu Kep Luai@ U Thet Khaing nih a chim mi cu "Kum 1965-66 hrawngah Pu Phir Kio khuabawi a tuan lio ah, kei hi hngakchia ka sinain, Cazi ah a ka ser. A catialtu men ka si. Cu lio ah Chin Oo Sii- Ohkathah Buhmu San Kho Lian nih Rimpi timi cu Kawlca awcawi in rel a har. Rinpi tiin tial zongah a ngah ko tiah a ti caah RINPI tiah ṭialṭak a si. Cucu a cang taktak mi thil a si. Ka palhnak a um ahcun ka ngaihthiam uh" tiah facebook comment ah a ṭial. Kanmah tein RIIMPI tiah kan i chim zungzal ko nain, OFFICIAL WRITTEN NAME le ADMINISTRATION lei nih RINPI ti lawng tein an kan ṭial. Atu kum 2017 in cun kum 52 a si cang.
Kum 1992 lio zongah Pu Rua Hmung, Pu Va Tlun, Pu Al Thang, Pu Lian Cuai, Pu Tial Dum, RINPI tiah an ṭialmi hmanthlak a si. (Khua hlun lio photo)
Cuticun Biaknak le uknak lei aa khat lo cu hmailei ah buainak a um sual lai tiah ruah asicaah Church Logo cu RINPI tiah remh a si ve. A tanglei hi Rinpi biaknak lei nih hmanmi Logo a ii.
A tanglei hmanthlak hi kum 1999 ah Rinpi khrihfa Sui Jubilee kan tuahnak ro lungphum a si. Biaknak lei Sui Jubilee zong RINPI TIPIL KHRIHFABU tiah rak tuah a si.
A tangla hi Rinpi mino nih phum tak mi khua luhnak signboard a ii. WELCOME TO RINPI tiah ṭial a si.
Cuticun Official in caṭialnak poahpoah RINPI ti lawng tein nihin ni tiangah kan hmang hna. Asinain kanmah te in cu RIIMPI tiah kan i chim lengmang ko. Abikin Falam peng kan unau sinah kan chim tikah RIIMPI tiah kan i chim.
Min cu ṭial tikah Official ṭialmi in ṭial a si
RINPI hi khualsim kan si caah kan min kan i ṭial mi an i khah lo nak tete a um. Zeicatiah Hakha ca in kan ṭial tawn. RINPI cu uknak lei in siseh, biaknak lei in siseh, Hakha tangah a ummi kan si tikah, kan min ṭial tikah ah Hakha Laica kan hmannak a si.
Example 1:
San Thang cu Chan Thang tiah kan ṭial.
San Uk Mang cu Chan Uk Mang tiah kan ṭial.
San Ceu cu Chan Ceu tiah kan ṭial.
Kan kawh-auh tikah ahcun "San" kan hmang nain, kan hmatpungtin le kan ingthawngsuh cazin hna ahcun Official in kan tialmi ahcun "CHAN" tiin kan hmang. Kan khua min zong hi cu bantuk cu si ve. Min cu ṭial tikah Official Written Name hi hman a si zungzal.
Falam lei peng nih cun an min ah (San Lian Mang) tiah an i auh bantukin an Official Name an tial tikah zongah San Lian Mang tiah an ṭial ve. (Chan Lian Mang tiah an ṭial lo). Cutikah buainak a um lo. Kan nih khua cu Hakha Myone uknak tangah kan um tikah San kan timi cu Chan timi in kan official min kan ṭial.
Example-2;
Falam pengah a um mi Dawt Sin Par cu official in min aa pek tik zongah Dawt Sin Par tiah aa pe.
Sihmanhsehlaw Rinpi khua a ummi " Dawt Sin Par" cu sianginn apnak, Hmatpungtin, Ingthawngsuh cazin zongah siseh, " Dawt Chin Par" tiah aa pek. SIhmanhsehlaw kan auh tikah kanmah Rinpi khuami nih cun " Dawt Sin Par" tiah kan auh thiamthiam ko. Cuticun "Sin" timi zong "Chin" tiah kan ṭial. Kan hmurka in zeibantukin kan i auh zongah kan tial tikah Official min in kan ṭial hna. Zeiruangah ti ahcun Hakha peng uknak tangah kan um caah a si.
Internet ah Map (mepung) te hna zongah RINPI tiah hman a si
(1) RINPI timi cu kum 1965 thok in RINPI tiah cozah le uknak lei in kan hman. Kum 52 lengpi tiang kan hmang cang. (2017 tiang ah)
(2) Geographical Name (Geonames) Vawlei cung mepung cungah Register an tuahnak ah kan khua min cu RINPI tiin a ii.
Cuticun nai te hruak Vawlei cung me-pung ah kan khua min cu hmatpungtin a ii. Original an tial ning :
(Welcome to Rinpi
Rinpi is situated in Chin State, Burma. Original name (with diacritics) of the place is Rinpi. Geonames-ID: 1298739. Rinpi maps, photos and images from google. Read wikipedia articles about and around Rinpi. Other places near Rinpi. More information about Rinpi. This placemark was added 1993-12-21.
A ṭial mi Rinpi cu me-pung an luhnak nambat Geonames-ID: 1298739 in Kum 1993 December thla ni 21 ah cozah nih an luh ter.
(3)Vawlei cungah RIMPI KHUA (Rimpi Village) hi a um ve. Finland ram ah Karelia pengah a um. AD kum 1800 ah an dirh mi khua a ii. Hi nang link hi RIMPI khua kong an langsaknak ii, lehla cio ve uh. http://www.juminkeko.fi/viena/en/rimpi.html
Internet kan khua min check tikah RIMPI tiah kan tial ahcun Finland ram Rimpi khua lawng hmuh a si. Atu kan khua min cu Internet chungah RINPI ti lawngte in ṭial a si.
(5) Hi a tanglei link pawl ah kan khua min Rinpi ti lawng tein an kan tial. Uknak lei he aa pehtlai mi websites le weather.com ti bantuk ah RINPI ti lawngin an hman hna.
· Myanmar Information Management Unit nih an tial ning ah RINPI tiin an tial.
· Khua caan zohnak (Weather.com) nih RINPI tiah an ṭial.
· Traveling Agency Pawl nih RINPI tiah an ṭial.
· MAP CARTA WEBSITE nih khaw RINPI tiah a kan ṭial. 
· Vawlei Mepung (World Map) Register Tuahtu Bu nih RINPI tiah a kan ṭial.
· NGO La Ih an ngeih mi MAP ah khaw RINPI tiah an kan ṭial.
· Wikipedia ah khaw HAKHA township min kong an ṭial tikah RINPI tiah an tial.
· WIKIPEDIA ah kan khua min tial mi (Kamah tial mi a ii) RINPI tiah ka ṭial.
-
(7) Kum 1999 ah Khrihfa Bu tuanbia cauk an chuah tikah RINPI tiah an ṭial.
(8) Kum 2016 February ah ca uk ka ṭial mi chungah RINPI tiah ka ṭial.
(9) Biaknak le Uknak la tazeihlung le Logo vialte cu RINPI ti lawng te in tial a si.
---------------------------------------------------------------------------------------------------------
Rinpi in Rimpi Aa Thok Ning
Kan khua min kong ah buainak a chuak bal lo. Asinain kan chan le kan ram sining ruangah RINPI khua mi pawl zong Malaysia kan phan. Malaysia kal an i thawh hlan ah Yangon ah Passport an ser. Cuka zong Rinpi tiah an hman. Rinpi khua in an i thawh tiang zong uknak lei in siseh, recommendation an tial tikah Rinpi tiin an i thawh hna. Sihmanhsehlaw Malaysia an phak tikah hruaitu cheukhat nih UN Refugee an sok tikah RIMPI tiah an tial ter hna. Cun Malaysia ram chung an kal chung RIMPI timi in Bawlung chuihnak angki an tuah hna.
Haiphai Khua mi Pu Bawi Uk nih a chim mi cu "Malaysia ah kan um lio ah RINPI tiah ka ṭial i Tial Mang nih RINPI cu midang nih a kan kawhauh nak a si. Nanmah unau tal nih RIMPI tiin kan ṭial uh tiah a ka ti" tiah U.S.A Khuasim Viber Group ah a kuat chim. Cuticun Malaysia phat hnuk in Malaysia Khualsim Fellowship ah le, Malaysia Mi E Peng Fellowship ah RIMPI tiah a ṭial hram an thok.
Cun Rinpi khuami hna zong Kalay peng le Hakha khuapi ah a pem mi kan tam ngaingai ve. Rinpi khua in an i thawh lio ah kan khua luhnak siseh, chuahnak siseh, Jubilee tuah mi siseh, Khrihfa bu logo, stamp vialte zong, khuabawi recommendation, pungsang 10, pungsan 19, an lak mi vialte zong Rinpi timi lawngte a si. Cun Rinpi khua an chuah taak hlan cio ah Rimpi tiah ahohmanh nih an hmang hna lo. Asinain Rinpi khua an chuah taak hnu in "Rimpi" tiah hman hram an thok.
Cuticun kum 2013 ah Biakinn luhnak puai tuah a si. Rev. Tum Peng (Kalay Myo a um lio mi) nih kan khua biak-inn signboard an kan hlut ii RIMPI BAPTIST CHURCH tiah a ṭial. Sihmansehlaw, kan khua luhnak cataar, RINPI SUI JUBILEE , WELCOME TO RINPI tiah aa ṭial cia ningin a um rih. Cun HBA zung zongah pumpak in RIMPI tiah kan ṭial uh a ti hna.
Cuticun kan khua a phan mi khual le khua kiangkap minung pawl nih nan khua min hi zeitindah a si? tiin an kan ti lengmang. "HBA GS, CACC GS nih bia rak kan fianh uh a kan ti" tiah Rev. Sang Hmun nih kum 2014 December 05 ah Pu Rua Hmung in meeting tuahnak ah a chim.
Cuticun Rinpi khua mi thawhkehnak puai caah meeting cu Pu Rua Hmung (Ohkathah) inn ah an tuah. Cuka ah an ka sawm ve. Cuticun kan khua min kong cu a zong an rak caih. Cuka meeting a kai mi ka theih khawh tawk in: Pu Rua Hmun, Pu Hoi Mang, Rev. Sang Hmun, Pu Rua Khum, Pu Tial Awi, Pu Al Thang, Pu That Lian, Pu Sial Uk, Pu Thang Cung, Pu Cung Lian, Pu Bawi Hnin, Pu Cung Ve, Pu Iang Ling, Salai Ni Peng Ling, Pu Lian Thang pawl an si. Cuka ahcun kan ṭial tikah RINPI tialtiaknak sisehlaw, kan i chim tikah RIIMPI ti zong kan I chim zongah a poi lo tiah an ti.
Cun Rinpi Church Logo ka hal hna ii, Official Letter Head te he computer in Salai Ni Peng Ling nih a ṭial piak hna hnu ah, Rev. Sang Hmun (Church Pastor), Pu Rual Khum (Church Chairman) le Pu Rua Hmung (Ohkathah) nih minthutnak an tuah.
--------------------------------------------------------------------------------------------------------------
Pumpak i auhnak miphun min le ram min
JAPAN cu a min taktak cu Nippon an si, anmah nih cun Nippon an i ti. Sihmanhlaw, Official an ram min an tial tikah JAPAN an ti tial.
KOREA cu a min taktak cu Hankuk an si, anmah nih cun Hankuk an ti ko. Sihmanhsehlaw, Official in an ram min an ṭial tikah KOREA an ti.
SINGAPORE an min ah SINGAPURA a si. Majulah Singapura tiah an ram hla zong an sak ko. Asinain Official in an min an ṭial tikah Singapore tiah an ṭial. MALAYSIA cu a hlan anmin ah Malaya ti a si.
REPUBLIC OF UNION OF MYANMAR cu a hlan UNION OF BURMA ti a si. Kawlram cozah/ ralkap cozah nih Kum 1989 ah Union Of Myanmar tiah an thlen. MYANMAR tiah an thlen tikah Official in MYANMAR tiah kan hmang ve.
Yangon cu a hlan Dagon a ii. Mirang nih Rangoon tiah an ṭial. Nihin ah Yangon tiah an ṭial.
HAKHA cu Halkha, HAKA, HAKHA tiah a thlen a si. Official in kan hman cio mi cu HAKHA ti hi a si. Kum 1992 tiang ah HAKA tiah an tial rih.
Mirang chan ah Thlantlang tiah an ṭial. Nihin Thantlang tiah an ṭial.
Mirang chan ah TUCK & CAREY nih RIMPI tiah a kan ṭial. Kawl cozah chan Pu Phir Kio khuabawi chan lio ah, Buhmu Son Kho Lian nih Pu Kep Luai cu RINPI tiin ṭial dingin a fial. Pu Kep Luai cu Pu Phir Kio caṭial bawmtu a si.
Tuanbia nih a kalpi ningin minung min cheukhat kan I thleng ve. Kanmah Rinpi mi hna zong Malaysia kan va kal tikah REFUGEE in ram thumnak a phan mi zong nih a herh ruangah an min an i thleng ve. Pumpaak in mi aa thleng mi hna cheukhat langhter ahcun...
Tahchunnak ah :
TUAN CEU cu NEI CUNG THANG in aa thleng.
Cun PU NGUN HRE cu AUNG CUNG aa thelng.
VAN HNIN cu THAWNG CUNG ah aa thleng.
PU MANG KIL cu LIAN KHAN ti a si cang.
HRAM LING cu Van Bawi Lian ah a thleng.
KHIN MAWNG cu TIAL TUNG tiah aa thleng.
HNIANG CEU min cu ZAM BIK ah aa thleng.
ZAM BIK cu KAP CUNG aa thleng.
HMILH AUNG min cu SUI CUNG aa thleng.
--------------------------------------------------------------------------------------------------------------
Khua min thlennak nawl a ngeitu ahodah a si?
Khua le ram min kong an thlen tikah a thlengtu kho tu cu " 2008 Constitution" ningin Union Of Myanmar President lawnglawng nih a thleng khawh.
2008 Constitution, pohmah (54), ah " Ramthen min, ramkomh min, cu chung ii a um mi khua mi, Ohsuh min, Sangleveng min, khuapi min, district min, remhnak, a tharsernak le minthlennak kong pehtlai in Chief minister hna nih Ramkulh President sinah lungtlinnak an hal hnu ah ramkulh president nih a herh ningin a tawlrel lai" tiah an langhter.
----------------------------------------------------------------------------------------------------------------
Ram leng a um hna nih an buai hnawh lengmang hna caah khrihfabu nih General Meeting ah a caih pi hna
Kan khua min kong cu Rinpi khua ah a um ti lomi hna nih an buai hnawh lengmang hna caah kum 2017 January 28 ah khrihfabu General Meeting ah an chuah pi ṭhan.
Cuticun General meeting biachahnak in RINPI in hman si ko seh, tiah biachahnak an ngei ṭhan. Cuticun kum 2013 Rev. Tum Peng nih Signboard a tar mi RIMPI BAPTIST CHURCH timi cu kum 2017 January 30 ah RINPI BAPTIST CHURCH tiin a hlan hmancia ningin an ṭial than.
--------------------------------------------------------------------------------------------------------------
Biaknak la biachahmi cu ramleng a um mi pawl nih an duh lo caah le kan khua minung in ka i then lai an ti caah kum 2017 February 04 ah Ohsuhcazi Pu Tial Awi le Ohkahtah Pu Hoi Mang hruainak in mee thlaknak an tuah. Thimfung an thlak mi chungah: RIMPI a duh deuh mi an tam deuh. RINPI in thimfung thla mi an tlawm deuh.
Kum 2017 Vanha HBA BM civui ah Pu Hoi Mang (Khuabawi) le Pu Doi Hniar nih HBA nih Stamp thar, RIMPI in khenh mi stamp kan pe uh tiah an hal hna. Cuka ah Church Pastor Rev. Sang Hmun siseh, Pastor Cung Hnin siseh, khrihfa upa dangdang hna zong an um ko nain, vawlei lei riantuantu hna nih an chim tikah civui a kal mi hna cu an ning a zak ngaingai.
Cutikah zeitik kum in RINPI tiah hman a si, tiah an hal hna tikah Rev. Sang Hmun kum 1965 ah hman a sinak kong a chimh hna. HBA hna nih nanmah i ruahcaih uh an ti hna.
Cuticun February (19), kum 2017 ah kan khua ah Rev. Sang Hmun (Church Pastor) nih meeting a sawm hna ii, Pu Hoi Mang (Khuabawi) , Pu Doi Hniar (Hakha cozah riantuan) le Pu Tial Awi (Ohsuhcazi) cu min thlen dingin tuanvo an pek hngai.
Asinain uknak lei hruaitu hna nih kan min cu cozah sinah thlen i tim loin biaknak leitu thlen an i tim.
Khua pakhat ah biaknak lei pehtlaihnak caah riantuantu cu church pastor le khrihfa upa, E.C chungtel hna an um.
Cun cozah lei he pehtlaihnak rian a tuantu ding ah khuabawi, ohsuhcazi an um. Asinain anmah rian tu tuan loin biaknak lei hruaitu hna nih an tuan dingmi tu tuan an i tim.
Cun a hlan ii Rinpi Baptist Youth Fellowship nih khualuhnak caa an tarmi cu Pu Hoi Mang (khuabawi) nih aa hrawh ii,
Welcome To Rimpi
ရင္မ္ပီး ေက်းရြာမွ လွဳိက္လွဲစြာ ႀကဳိဆုိပါသည္။
tiah a tial. ႀကဳိဆုိပါ ၏ zong an hman duh lo. လွဳိက္ zong လူိက္ tiah an tial.
----------------------------------------------------------------------------------------------------------------
RINPI POST INTERNATIONAL
No comments:
Post a Comment