Mipa pakhat cu zalam pawngah khairiat balloon a zuar hna. A zuar mi kaihriat ballon hna cu a rong (color) an tling. Aihre (yellow), Asen (red), Adum (blue), Ahring (green), Anak (black) tiin a zuar hna. Tamdeuh a zuar khawh nakhnga kaihriat balloon chungah Helium datkhu a rawn hna. Helium cu thli nakin a zaangdeuh caah thli nih a cawi hna i thli chungah an zuang kho taktak. Mipa nih vo-hri in a ṭem hna i zalam tlang ah a zuar hna.
Voikhat cu biahal a pang tak mi hngakchia pa pakhat a ra i, “Ka Pu hi balloon a sen mi te hi a hri thlah law, a cungah a zuang lai maw?" tiah a hal. Mipa nih hngakchiapa te cu a thawh i, “Mi pa te a zuang ko lai. Asinain asen ruangah a zuan khawh mi a si lo. Ahring mi zong hi ka thlah ahcun a zuang ve ko lai. Cun arang mi hi zong a zuang ve ko lai. Cunglei ah a zuantertu hna cu an lenglei an rong (Color) ruangah a si lo. An chungah a um mi thil ruangah a si,” tiah a leh.
Minung kan nunnak zongah an si ve. Minak kan sinak, mirang kan sinak, pumngan, pumhme, mider, mithau kan sinak hna hi minung kan sinak a kan cawisangtu an si bal lo. Asinain kan chungah a um mi kan thinlungput, kan ruahnak tu hi cungah a kan cawisangtu cu an si. Cu caah nifatin hngakchia kan si ah, mino kan si ah, upa kan si ah, kan nunnak kan i zohṭhan lengmang a herh.
Zeibantuk thinlungput he dah caa kan cawn?
Zeibantuk thinlungput he dah rian kan ṭuan?
Zeibantuk thinlungput he dah kan hawile kan komh hna?
Zeibantuk thinlungput he dah a kan hruaitu pawl (Pastor pawl) kan zoh hna?
Zeibantukin thinlungput he dah kan unau kan i biakchonh hna?
Zeibantuk thinlungput he dah biak-inn kan panh?
Zeibantuk thinlungput he dah meeting kan kai?
Zeibantuk thinlungput he dah chawlehnak kan tuah?
Zeibantuk thinlungput he dah…tiin ni fatin kan tuah mi kip ah kan thinlungput cu kan i zohṭhan zungzal a herh. Zeicatiah cu kan thinlungput cu kan nunnak cungsang ah a kan cawisangtu cu an si. Baibal chungah Jesuh nih, "Nan lakah mi nganbik si a duh mi nih cun a niambik a si awk a si", tiah a ti. Cu thinlungput cu teinak le hlawhtlinnak hmuh a duh mi hna nih kan ngeih awkah a herh zungzal mi thinlungput a si.
Sianghngakchia hna cu an cawn mi cauk, an rel mi cauk, chimtu saya pakhat nih a chimh hna. Asinain cheukhat cu an thiam deuh, marks sang deuh an hmuh. Hmun khat te cinṭi mi tisik anhnah, ti aa tluk te in toih cio mi bantukin chimh mi le cawnpiak mi cu aa khat cio an si ko nain an cohlan ning an i khat cio lo. Cucu an thinlungput hmunhma aa i dancio ruangah a si.
Cheukhat an ruahnak hmunhma cu thil dang a rak um cang caah ti a khat cia mi hrai bantukin chim zongah an ruahnak chungah a tang kho ti lo. Cheu cu thinlung ruahnak innka an khar. An ruahnak chungah zeihmanh a um lo nain, chimh mi an chungah a lut kho lo. Cheukhat cu thil dang a rak um cia mi a tam caah tlawmpal te lawng an rawnchap khawh. Cheu khat cu kan khuaruahnak ri kan khiah. Cu kan ruahnak ramri lengin zeithil hmanh kan luhter kho lo.
Hringtu nu le pa pakhat tangah a ṭhang mi unau rual lak zongah zeiruangah teinak le hlawhtlinnak an hmuh ning an i dan cio hnga? An cungah a sur mi ruah cu aa khat ko. A cawn piaktu le a hruaitu hna zong an i khat ko. Asinain zeiruang ahdah voi tampi cu sining dang pipi in an nunnak muisam an langh tawn. Cucu kan sinah a rak phan mi thil paohpaoh a cohlangtu thinlungput ruangah an si.
Mi pahnih nih namtong (knife) an ngei veve. An cu aa khat. Asinain zeibantuk thinlungput dah an ngeih? timi cungah hngat in an tuahserning an i dang. Cu an tuahsernak nih a rak chuahpi mi theipar cu an nunnak nih a ei din ve.
Pakhat nih mi va thahnak ah a hman. A nunnak nih a theipar an hmuh mi cu lainawngpa timi a si. A dang pakhat nih khachuan riamnak ah a hman. A nunnak nih a theipar a hmuh mi cu rawl a ei mi chungkhar hna an i lawm. A hawikom hna le a pawngkam minung hna an i lawm.
No comments:
Post a Comment