Na Thih Hnu Ah Zeidah Chiah Taak Na Duh?

A luancia mi kum 100 hrawng ah mipa pakhat a um. Voikhat zing cu zingka thawngzamh ca phawtu pawl nih an rak put mi thawngzamh ca (news) cu a rel. Minung thihlohnak kong thawngthanh (obituary column) ah a min a rak hmuh tikah thinphannak le launak in a khat. Chikkhat cu zei tuah awk thei loin a um. A tihnak le a lau thinlung teinak ding a hun i zuam. "Keimah he min aa khat mi a si i an kan palh le a si lai"tiah a ruat. A thinlung daihnak a hun i zuam hnu ah, a zoh than tikah amah kong a si ko. Asi ahcun midang nih ka kong hi zeitindah an tial timi a hun rel.

"Bomb Siangpahrang A Thi", " Thihnak Phortu Pa A Si" tiah thawngzamh ca hna nih an tial.

Amah cu phuah hmang mi "Dynamite - Bom" a sertu pa a si. A kong an tial mi cu a rel cuahmah tikah a lung a rawk ngaingai. Ka thih hnu ah vawlei pi nih an ka theih tikah ' Thihnak phurtu pa" tiin maw an ka theih ko lai? Amah le mah bia aa hal.



A thinlung ngaihchiatnak in a khat. "Thihnak a phurtu pa" tiin midang in an ka hngalh ding cu ka duh mi a si tung lo. Minung hna kan thathnemnak caah tiin pei bom cu ka rak ser ko cu tiin, a lung a rawk ngaingai. Cu ni thok cu "Remdaihnak- Peace" caah riantuan hram a domh. Cu pa a min cu " Alfred Nobel " a rak si. Cuticun nihin ni ah vawlei cung laksawng vialte lakah a sunglawi bik tiah an ruah mi laksawng min " Nobel Prize " a si.
Cucu Nobel Prize aa thoknak a si.

# Kan nih tah kan thih hnu ah zeidah bantuk thil dah chiah taak kan duh?
# Midang nih zeitindah rak ka thei hna seh ti na duh?
# Na thih hnu ah na kong an ruah tikah lawmhnak le dawtnak in a si lai maw?
# Na kong zeibia pawl dah an chim te lai?
# Ngaih mi na si lai maw?