Na Chunmang Na Tlinterkhawhnak Dingah Midang Lungtlinpinak A Herh Lo

A cheu kha zumh awk tlak lo an rak si si kaw, zeitindah a si kun lai? Cu ruangah cun Pathian zong cu zumh awk tlak lo a si ve lai tinak a si maw? (Roman 3:3)

Voi tampi ah mi tampi cu kan thinlung ah a um mi chungmang le ruahnak tha hna kan tuah lai ah midang ruahnak kan hal ta hamsat tawn hna. Mi tam deuh in kan ruahnak an kan lungtlin ahcun kan i nuam. Mi tamdeuh a si khawh lonak le a chiatnaklei in an kan ti tikah kan lung a zur tawn.

Kan hngalh zungzal ding mi cu thiltha kan ruah mi cungah "Naysayers" a si kho lo tiin lungtlin lonak lei kap in a chim mi an um zungzal ko. Hi bantuk lio ah kan thinlung ah a um awk a si mi thil pakhat cu - kan chunmang hna kan tlinh khawh nakding ah midang nih an i zumh le zumh lo kha a biapi mi a si lo. Midang hmurka le ruahnak cu na nunnak uktu a si lo. Asinain na nunnak cu nangmah nih zeitindah naa zumh in, nangmah kong ah zei bia dah na chim? timi ah khin a um mi a si. Cu nakin a biapi deuh rih mi cu Bawipa nih a chim ning khaan a nung mi na si.

Midang nih na cungah zumhnak an ngeih lo zongah a poi lo. Paul nih cun "Minung nih zumh awktlak lo kan sinak ruangah Pathian zong cu zumh awktlak lo a si tiah kan ti kho lai maw? Midang nih an zumh lo zongah, midang zumh lonak nih kan zumhnak le ka hmuitinh cu a ka kham kho lai lo"tiah a ti. Bawipa nih na thinlung an chiahpiak mi chunmang dawhdawh hna cu midang tuahsernak, midang hmurka, midang ruahnak pek mi a tling lai lo. Cu chunmang vialte tlamtlintertu ding cu nangmah le nangmah cungah zumhnak na ngeih mi lung biahrennak na ngeih mi tu nih tlam a tlinter lai. Midang bia in a si lai lo. Midang tuahsernak in a si lai lo. Midang lungtlinpinak thawngin a si lai lo. Bawipa auhnak tu ngai in, Bawipa nih a thok mi cu amah nih a donghnak a hngalh tiin Bawipa pek mi kan lungduhnak cungah le Bawipa pek mi kan thazang thawnnak cungah zumhnak kan ngeih ding lawng hi a biapi mi cu a si. 

# Na thluak khuaruahnak zul loin na thinlung duhnak zulh khawh i zuam. 

# Na chungmang kongah midang nih lawmhnak le thlaknak bia hna cu an biapi lo. Anmah kha na chungmang tlintertu ah Bawipa nih tuanvo a pek mi hna an si lo. Na chungmang cu nangmah nih tlinter awk ah Bawipa nih an pek mi a si.

#Careltu vialte nan chungmang tlinter kho tu siding ah Bawipa nih thiangthlarau in thawnnak in in bawm ko hna seh!