RUAHCHANNAK A NGEI MI KAN SI

Job (11:18)

"Cun ruahchannak a um caah hnangam tein na um lai i him tein naa din lai."

Nihin kan vawlei ah thil sining tampi nih hnulei ah a kan hnuh lengmang tawn. Kan pawngkam kan i mer luklak ah thawngpang chia hna kan sinah an phan lengmang. Thawngpang chia hna nih thal kah bantukin theih kan duh lo zong kan nunnak ah hramhram in an rak phan tawn. Nunnak cu harnak le zuamcawhnak in an khat ko lai. 

Sihmanhsehlaw,

Pathian nih zuamcawhnak thil hna lakah a kan pek mi daihnak le hnangamnak a um ko. Ruahchanhnak le zumhnak kan ngeih zungzal ahcun, kan nunnak phak kan duhnak hmun kan phan kho ko lai. Sirem lo ngai in kan nung ko lai. Zaan hngilh merem loin kan um ko lai. Sihmanhsehlaw,

Tihnak le thinphannak kan ngei lai lo. Zeicatiah nangmah le keimah a kan dawtu Bawipa cu zungzal nawlngeihnak siangparhang thutdanh cungah a thu zungzal ko. Zeizong vialte nih kan caah thiltha siding ah a kan timhpiak mi lawngte an si ko. 

Ruahchannak he nun timi cu Bawipa chiti thuh mi nunnak chung ah kan nunnak kar hlan khi a si. Cu nih a langhter mi kan pawngkam i khenkhamtu le lungrawhnak hna nih kan nunnak harnak a kan pe kho lem lo. Kan nunnak nih kan Bawipa sinah zumhnak a ngeih. Ruahchannak a ngeih. Zumhnak le ruahchannak he kar kan hlan tikah kanmah tein kan i tuah khawh lomi thil hna cu Bawipa nih kanmah ai-awh in rian a kan tuanpiak tawn. Kanmah nih tihphannak thinlung he kan i zuam len a herh tik lo. Lungretheihnak nih kan nun a temtawn ti lo. Zeizong vialte cu anmah le an dirhmun an si ning te ah ningcang in an um ko hna. Na phak awk a simi nunnak ah na phan kho lo men, sihmanhsehlaw ruahchannak a um ko. Bawipa nih luatnak le teinak pek a kan duh zungzal ti kan philh lo awk a si. Amah cu kan caah zumhawktlak a si zungzal. 

Kan minung hawi cu zumh tlak lo in a kan um tak kho men, sihmanhsehlaw kan Bawipa le kan Pahian cu kan caah zumh awktlak a si zungzal. 

Na chungmang kong ah Amah cu zum ko.

Na harnak le zuamcawhnak cungah Amah cu zum ko.

Khuaruahhar in a riantuannak le a kut thawng cu i ruahchan zungzal ko usih.

Khrih thawng in ruahchannak a ngei mi kan si!