Mi pakhat nih laksawng an cawkpiak. Nangmah ca bak ah a cawk mi a si. Sihmanhsehlaw an pek tikah na cohlan lo ahcun cu laksawng cu aho nangmah ta a si lo. An petu nih an pek ko nain, na cohlan lo tikah cu laksawng cu a petu pa ta ah a cang.
Voikhat company pakhat ah rianṭuantu pakhat cu thil rianngeitu hna nih rian lawng an fial lengmang. Tuannak caan khi an pe hlei lo. Khat lei le khat lei ah an auh lengmang hoi. Ni a liam tikah- a rian cu a tlamtling ti lo. Cutikah rianngeitu (Boss) nih a ti mi cu- na hrut tuk- ziah cu ti- kha ti - khan na tuah lo, tiah a sik hoi. Mihrut- tiah a ti tikah rianṭuantu pa cu a thin a hung ngaingai.
"Boss, laksawng mi na pek tikah an in cohlan lo ahcun cu laksawng cu aho ta dah a si lai?"tiah a ti.
Rian ngeitu pa nih, "A petu, keimah ta a si ko lai. Midang ka pek hlan cu..!"tiah a ti.
Rianṭuantu pa nih, "midang na pek mi hna nih an cohlan ve lo ah tah?"tiah a ti.
"Keimah ta a si ko lai" tiah rianngeitu pa nih a leh.
Rianṭuantu pa nih, "Atu nai- Mihrut (Stupid)- na ka ti mi kha ka cohlang lo", tiah a leh.
Hi tuanbia ah kan hmuh khawh mi cu - kan nunnak chungah thil a phan mi hna hi kanmah nih kan cohlan lo ahcun kan nunnak uktu le hruaitu an si kho lo. Kan nunnak chung hmual an ngei lem lo. Kan nunnak hrawhhral khawhnak thazang zong an ngei lo, cawisan khawhnak thazang zong an ngei lo.
Sihmansehlaw kan nunnak chungah a phan mi thil hna cu kan cohlan hna tikah kanmah ta ah an cang tawn. Zeitindah na cohlan le cohlan lo naa theih lai?
# Mi pakhat pakhat nih na thangchiatnak kong a chim tikah zeitindah na thinlung a um?
Na thin a hun i, a kangh in na kangh ahcun - midang nih an in pek mi biatha lo cu na cohlang tinak a si.Cheukhat cu hmaitonh tein an kan ti lo hmanhah midang sinin kan theih chin mi bia hna i fahsak kan hmang. Lungfahnak kan hmang tawn. A va hman kho ko men. Asinain palh zong a va palh kho ko. Cucu kan i lungfah pi, zan mitku thaw loin an kan tuah. Kan ruah deuhdeuh, kan thin a lin deuhdeuh. Midang nih na thiam lo an kan ti ah.."um ka thiam lo" kan ti. Midang nih "Mihrut"an kan ti ah.."Um..mihrut ka si"tiin kan cohlang. Cu tikah kan nunnak cu zei he dah aa lawh. Midang nih an duhnak paoh ah an vor mi thil bantuk a ii. Lenglei thil nih kan nunnak an hruaitinak a si.
Sihmanhsehlaw, na thinlung ah zeihmanh poi loin, an cung zongah lungfahnak ngei hlah! Nangmah le nangmah cung zongah naa upatnak a zor hlei lo ahcun an chim mi (mei cantiang in an in kah mi) cu na sin an phak tikah an mit dih, an thi dih ti nak a si. Na nunnak cu a lenglei in thil a rakchuak mi nih a uk mi a si lo. Chunglei in (nangmah thinlung chungin) a rak chuak mi ṭhawnnak nih an hruai tinak a si.
# Midang zeithil dah kan pek hna timi a biapi ngaingai.
A cung ka langhter bantukin midang sinah biachia kan pek hna tikah- an cohlan ahcun na lung di a riam kho men. Sihmanhsehlaw bia chia le bia ṭha lo, midang kan va pek mi hna cu- an cohlan lo tikah kanmah ta ah an cang tawn, timi hi kan philh lo awk a si.
* Kan Lai holh ah - Mah kung tlung- timi a um. Kan chim mi bia bantukin kan nunnak chungah a phak tikah kanmah tu kan tuar mi kha "Mah kung tlung"an timi cu a si.
Bia ṭha chim a sungh lo nak cu na pek mi hna nih an cohlan ahcun- an caah a ṭha. Na saduhthahnak a tling. An cohlan lo tiangin nangmah ta a si lai caah- na sunghlei lo.
Midang zeithildah pek kan timh hna awk a si.
Thil ṭha lo maw? Thil ṭha dah?
No comments:
Post a Comment