Diamond le Sui Nakin Na Sunglawi Deuh

Pu Lian le Pi Hnem nih fanu fangkhat te an ngeih. An fanu te cu an i zohthla tuk. A hngakchiat tein a nunzia cu duh a nungtuk hringhran. A kum a hung upat tikah lengno a hun si ve cang. Chan thar nungak a si bantukin a fenh aih tikah skirt tawi tete aa hruk tawn. Hawikom hna he zan ah leng chuah an hmang tawn. A umtu hoiher cu a pa nih a zoh tikah a ngaih a chia ngaingai. 

Hringtu a pa nih voikhat zanlei cu a fanu a auh. A fanu cu a zoh i,"Hannah, vawlei cungah thil mansung bik tiah minung nih kan ruah mi hna khi Pathian nih fawi tein hmuh khawhnak hmun ah a chia hna lo. Harsa ngai in i zuamduhnak thinlung a ngei mi hna lawnglawng nih biatak tein pekchanhnak he an kawl i an hmuh tawn hna".

 Diamond cu khua ah an hmuh tawn.Vawlei a thuh biknak hmun ah a um. Pearl pawl cu khua ahdah an hmuh? Rili chung a thuhbiknak hmun ah Kama titsa phaw chungah tha tein le him tein thuh mi a si. Sui cu khuazei ahdah an hmuh? Vawlei cung lunghak tampi le vawlei thap tampi nih an nenhnak hmun ah thuh a si. Diamonds, Sui le Pearl hna hmuh tinco duh tikah fawi tein hmuh khawh a si lo. 

Diamond, Sui le Pearl hna cawh a duh mi nih vawlei ngeitu an hal hna. Cun lungtlinnak an ngeih hnu ah seh thilri ngan pipi hna he an rat hnawh i an cawh hnu ah an lak khawh hna.

Hannah, na taksa pum hi Diamond, Sui le Pearl nakin a sunglawi deuh mi an si.  Man ngei deuh mi na si. Na taksa pum hi a thiang mi a si. Man ngei mi na si ruangah him tein na kilven  a herh. Na manngeihnak a theitu hna nih a ngeitu a si mi nulepa tha tein an kan hal lai. Cu hnu ah a thiang mi thit-umnak tuah hnu ah nan taksa pum cu an co awk a si lai. Nanmah le nangmah man ngei loin lungbo bantuk i mikip char in duhnak poah ah hman mi bantukin si lo dingin na zuam lai." tiah a ti. 

Hi tuanbia ah kan hmuh khawh mi cu nu hna nih kan man ngeihnak hi kan kilven a herh kong a si. Ngaknu tete nih zeibantuk ahdah kan man ngeihnak hi kan chiah. Man ngei mi nunnak in kan nun ahcun kan manngeihnak a thei mi hna nih an kan kawl ko lai. Man ngei mi thil hna cu fawi tein hmuhco khawh an si bal lo.