Thawhtertu Ruah Ti

"Bawipa cu fur caan ah ruah hal u law, thal caan ah ruah hal u, totho khuadawm a sertu Bawipa nih nannih cu ruah kha an pek hna lai i nan lo cio ah ram hring kha an pek hna lai" 

Zekhariah (10:1)

Mi zeipaoh nih dawntu thil tampi le lungrawhtertu thil tampi hna cu kan nunnak ah kan ton cio hna. Vawlei cung thil tampi nih kan nunnak thang kho loin, an kan nam chih tawn. Chikkhat te kan i ruah lo karah kan ngandam lo kong kan theih. Kan dawt mi ka nupi le kan va le hna he kan i pehtlaihnak rawhralh an i tim. Kan nungak, kan tlangval hna he kan i pehtlaihnak rawhralh an i tim. Ruah lo piin rian phuah kan tong. Lungrawhtertu thil tampi kan ton tikah kan lungthawh thanuamnak kan ngei kho ti hna lo. 

Voi tampi cu nunnak nih "kan chiahnak hmun ah nawlngai tein um ko" a kan ti caan a um. Cuticun kan duh zong ah duh lo zongah kan phaknak nunnak te ahhin i lungsi khawh kan i zuam tawn. Kan thinlung thetse ram hramno te bang, uai hninghniang in a um ko. Zeihmanh lungthawh thanuamnak thazang kan ngei lo. Sihmanhsehlaw, Bawipa mithmai kan kawl than tikah, a uai hninghniang mi kan thinlung cu an tho than. Thetse ram hramh no te nih uai hninghniang in a um lio ah, ruahpi nih a sur bantuk a si. Cu tikah kan tluk tik zongah kan tho than kho. Kan tluknak hmunte ah kan bok beh lo. Kan ral hna nih an kan tuk tikah Bawipa nih kan caah thatnak caah a kan thlenpiak. 

Nunnak nih a kan thluk lengmang tik zongah a tho than zungzal mi kan si ahcun zuamcawhtu kan ral hna cu zungzal a hmun mi an si bal lo. Kan tahnak mitthli cu zankhat an rau ko lai. Asinain zingka ahcun lunglawmhnak niceu a chuak than ko lai.  Lungtho thanuam tein dir ko usih, fek tein dir ko usih, zumhnak he hmai ah kal ko usih, zeicahtiah kan tluknak hmun in kan thawh than tikah - kan tluk hlan minung bantuk kan si ti lo. Thawnnak he a khat mi sinak in kan tho cang.  Bawipa bia cu kan thinlung caah nuntertu ruah ti bantuk a si. Amah cu kan herhnak le kan chambaunak ah cu ruahti cu hal lengmang ko usih. Amit hmai kawl zungzal ko usih. 

Bawipa nih thluachuahnak in pe ko hna seh!