Bawipa Cu Thlaici Petu A Si!

"Thlaici tuhtu hna thlaici a petu le ei awk rawl a petu Pathian nih cun nan herh mi thlaici vialte kha an pek hna lai" 2 Korin (9:10)

"For He is the one who provides seed for the farmer and then breads to eat. In the same way, He will provide and increase your resources and then produce a great harvest of generosity in you" (2 Corinthians 9:10).

Jesuh nih a zultu hna cu mi dam lo hna damter dingin, an herhbaunak bawmchan dingin le thawngtha bia chim dingin a thlah hna tikah, "Nannih nih hi thil tuah khawhnak cu man pek loin nan hmuh i, man pek loin va pe hna u" tiah a ti hna. Cu bia nih a langhter mi cu Pathian nih a herhnak hmun ah an hman khawh nakding ah zeizong vialte an pekcia dih cang. Teitu siding in le a thawng mi si dingin na herh mi thil cu pekcia na si cang. 

Caan tampi ah Pathian nih zeiruangah thlaici petu dirhmun aa chiah hnga tiah ka ruat. Thlaici petu siloin, eiding thlai rawl kan pe colh a si ko mi- tiin ka ruat tawn. Thlaici petu a si" tiah a peh hnu ah "and then" tiah a peh. Cu nih a langhter mi cu thlaici a um hnu ah rawl ei ding a um lai tinak a si. 
Thlaici cu cinthlakpiaknak, ruahti le zohkhenhnak a um lo ahcun a theipar hmuh khawh a si lo. 

Thlaici si ning ah hmunhma timhtuahpiak a hau. Cu cinthlak a hau. Ti toipiak a hau. Cu hmanh ah thlichia nih a hranh hnawh tikah a no lio, a than ka te ahcun an kiah a fawi tuk rih.   

Bawipa kan Pathian nih kan caah timh mi a kan ngeih piak. Cu a kan timhpiak ningin ka nun khawh nakhnga thlaici pek kan si. Lothlotu pa sinah thlaici petu bantuk a si. Sihmanhsehlaw  tuahcia (ready made) in a kan pe lo, timi hi a langhter. Lothlopa cu thlaici si loin, rawl ei ding pek a si ahcun nikhat lawng a nguh ko lai. Asinain thlaici pek a si tikah a kumkum in, a nun chung sitha tein le ei khim tein a nun khawh nakding caah a si.

Kan nunnak caah thlaici tlamtling tein a kan pek. Cu lawngin a kan chiah maw ti ahcun a si naisai lo. Cu thlaici a kan pek mi in sunglawi mi thil kan hmuh khawh nakding ah kan caah a herh mi  thilhram (resources) vialte zong kha a kan chap rih hoi. 

Bianabia ah mipa pakhat cu Pathian hlasak thiamnak thlaici a pek. Sihmanhsehlaw hlasak thiam mi le awtha mi a si colh maw? A si colh lo! Aw sang taktak phak khawhnak le a niam taktak hla aw zong chuah thiamnak a pek. Sihmanhsehlaw, solfa, music a cawn a hau. Ring-awn kal ning a cawn ta a hau. Aaa zuam ta a hau. Cu ti cun thlaici a ngeih mi cu a thlawhpiak lengmang hnu lawngah hlawhtlinnak a hmu mi hlasak thiam ah aa chuah kho. 

Biaralkah in hlasak thiamnak thlaici cu pek a si ko nain, hlasak thiam mi ah aa chuah kho lo men. Zeitik caan ah ti ahcun amah sinah pek a si mi thlaici kha a thlawhpiak lo tikah, a cin lo tikah, a hramh lo tikah - zeibantuk thlaici tha zong pek siseh law, ei bar a chuah pi lai lo. 

Lothlotu cu thlaici pek a si ko zong ah Lovahnak, Thinghaunak, Meiduahnak, hmunthur fimnak, cinthlaknak, tuanpiaknak hna a um lo ahcun a thlaici cu pakpalawng a si ko lai.

Minung pumpak cio kan nunnak zong hi Pathian nih thlaici tampi a kan pek cio. Hai hmin ei duh ko nain, haici zong pek a si ko nain, hai ci tuh a zuam lomi, aa tim lomi bantuk kan si sual hnga maw? Zei bantuk vawlei ah na tuh lai. Na nunnak Lo hma ah vawlei a thatnak ah maw? A chiatnak hmun ahdah? Cu lawngin a za lo. Thinlungput tha timi non nih a cawm a herh. Tuaktankhawhnak thluak nih nifatin ti tha a toih a herh. Cu ticun Pathian nih a kan pek mi thlaici hna cu a nun kho lai i, a kan timhpiak mi nunnak kan hmuh khawh nakhnga a kan pek mi thlaici hna cu thlawhpiak hna usih.