Thlacamnak Dawnkhaantu Thil Hna le Thlacamnak Hmual Ngeihtertu Thil Hna

Zumtu hna nih Pathian sinah cheuhra cheu khat kan pek mi chung ahhin kan caan suimilam  1/10 zong pe kho chinchin usih law, Pathian aa lawm tuk ko hnga. Pathian sinah kan caan suimilam 1/10 kan pek ding a si ahcun - nikhat ah suimilam 24 a um. Suimilam 2.4hrs khi Pathian sinah pek ding a si hnga. Nikhat ah 0.4 hrs cu minut 15 a si. Cucaah nikhat ah suimilam 2:15 hrs cu Pathian sinah kan pek awk a si hnga. 

Nikhat suimilam 2.15 chung thlacamnak a ngei mi nunnak nih hlawhtlinnak a hmu hrimhrim lai timi zong zumhnak ka ngei fawn. 

The Kneeling Christian timi cu cauk cu " Khukbil Khrihfa" tiah H. Than Hnun nih a let i, ka rel dih cangka te a si ve. Cu chungah thlacamnak kong he pehtlai in ruahnak tete a ka pek mi a um. Cucu Rinpi Post International a kan lengtu hna hrawm kan duh ve hna. 

Zumtu hna kan thlacamnak hi hmual a ngei tuk hringhran. Thawnnak zong a um. Cucaah satan nih khukbil in Pathian sinah thla kan cam ding hi a tih tuk hringhrang. Pathian hmai ah khukbil thla kan cam tikah satan cu a ther in a ther. Zeihmanh a tuah kho ti lo. Cucaah satan pa nih a tuah khawh mi cu zumtu hna nih thla kan cam khawh lo ding hi a si. Kan nunnak Pathian he hawikomhnak kan ngei lai i, Pathian thluachuahnak a kan pek sual lai ti a ttih tuk caah thla kan cam khawh lo nakding in a kan tukforh lengmang ko. 

Cu lakah satan nih a hman bik mi cu a hnu deuh ah thla cam te ko. Cucu tuahta hmasat, na caah cucu/khikhi a biapi deuh. Thlacam cu na duhtik paoh ah na cam khawh ko cuh, tiah a kan tuk forh lengmang. Thlacam kan thial lengmang nakah nikhat an liam ii, thlacam kan tlolh lengmang tawn.

Cun satan nih a hram rih mi cu - thla na cam zongah cam lo zongah na nunnak a thleng nemmam lai lo. Khi zum lo tuk hna khi zoh hna hmanh; thla an cam bal tung lo. An nunnak khi nangmah nakin khua awng an tong deuh lo maw? An nunnak ah hlawhtlinnak an hmu deuh lo maw? Thla na cam mi hna cu nangmah le nangmah i hnemhnak menmen ah a si. Na tuah ding rian fak deuh in tuan deuh ko. Zeidah thla na cam lengmang zong vawlei cung harnak cu na in thiamthiam ko lai. Cam le cam lo zeidah aa dang, tiin a kan hlen rih. 

Na sual tuk caah Pathian nih na thlacamnak a ngai duh lai lo. Hi tluk a sual mi hi ahodah an um ti. Thlacam ding zongah naa tlaak lo, nangmah um te khin um ko, tiah a kan hlen rih.

Cu hnu ah a kan dawtu hna hawikom hna caah thla kan cam thiamthiam tikah satan nih a hman rih mi cu - anmah caah cam a herh lo. Nangmah nakin khua awng a hmu deuh. Nangmah thlacamnak cu zei hmanh a si lo, tiah a ka ti rih. A kan leirawitu/ a kan dotu/ kan caah thatlonak khua a khangtu hna caah thlacam hrimhrim ding cu - an caah thla kan cam hnik fatin, kan cungah thil tha lo an tuah mi le an khaan mi hna kha a kan hmuh ter lengmang ii an caah thlacam kho lo dingin kan hlen rih. Kan thinlung ah an chuahsual hmanh ah a kan hrialter. Anmah caah cam lo dingin a kan tukforh rih. 

Zeicatiah - thla kan cam tikah midang pakhatkhat cungah ngaihthiamlonak thinlung kan ngeih ahcun kan thlacamnak cu pakpalawng a si timi kha satan nih fiang tein a hngalh. Midang cungah lungfahnak thinlung le ngaihthiam lonak kan ngeih chung paohpaoh cu kan thlacamnak hi hmual a ngei lo. Kan thlacamnak zong a hlawh tluang lo. Cuticun kan thlacamnak hi hrawhhralh dingah satan nih kan nunnak chungah aa zuam zungzal. 

Cucaah zumtu hna nih thla kan cam tikah a hmasat bik kanmah le kanmah kan cekhlai awk a herh mi cu - midang pakhat khat ka ngaihthiam lomi an um sual maw? Ka caah thiltha lo lawngte khua a khaangtu, ka thang a kan chiat tu minu/mipa cungah ngaihthiamnak taktak ka ngei kho maw? Midang cungah lungfahnak ka ngeih mi an um maw? Ka lung a ka fahtertu, ka mitthli a ka tlaktertu hna kha ka ngaithiam kho cang hna maw? tiin kanmah le kanmah kan i hal ta hmasat a herh. Ngaihthiamnak thinlung kan ngeih khawh hlan cu Pathian nih kan ngaihthiam khawh nakding ah thla kan cam ta hmasat a herh. Cu bantuk Pathian hmai ah aa dawh lomi thinlungput ruangah kan sualnak kan ngaithiam ko tiin Pathian sinah thla kan cam ta hmasat a herh. "Ka sualnak vialte Na ka ngaihthiam bantukin ka cungah thiltha lo a tuahtu vialte hna, ka mitthli a ka tlaktertu hna, ka thang a ka chiattu vialte hna, ningcang loin sual a ka puhtu vialte hna, ka lung kekkuai dih in a ka tuahtu vialte hna ...Jesuh na min in ka ngaihthiam hna. Zeicatiah ka sualnak cu ngaihthiam ka si ii, anmah zong ka ngaihthiam ve hna. Ka thinlung ah ngaihthiam khawh lonak thinlung a um a si ahcun ka pur in ka dap cikcek law, ka thinlung cu damter ko" tiin thla kan cam hmasat ding a si. Cuticun kan thlacamnak cu a hlawh a tluang a lai. 

Zumtu hna nih thla kan cam tikah a kan dawtu hna caah thla kan cam a herh tluk tein kan ral bantuk a simi, a kan leirawitu hna ca zongah thla kan cam khawh dingin hi a biapi tuk mi a si ve. Mihrokhrol hna, a kan dehcawhtu hna an rumnak le an thatnak caah thla kan cam khawh ding hi- a kan dawtu hna caah thla kan cam tluk tein an biapi tuk ve. 

Zumtu hna kan thlacamnak hi hmual a ngei tuk hringhran. Kan thlacamnak chung ah mit hmuh khawh lo, thawnnak nganpi aa thup. Cucu Bawipa ni hmu fiang dingin a kan duhpiak. Thlacamnak in tam deuh caan hman chinchin ding hi Pathian nih a kan duhpiak. Kan cam khawh lo bikah kan caan suimilam 1/10 tal cu thlacam ding hi a kan duhpiak. 

Pathian sinah kan duh kan herh mi vialte cu hal ko usih. Jesuh nih Pa Pathian nih sunparnak a hmuh khawh nakhnga caah kan min in nan hal mi paoh cu pek nan si lai, tiah bia a kan kam. Cucu minung biakamnak menmen a si lo. Pathian nih a kan kamh mi a si. Cu leng in biakam fek cu an um ti lo. Pathian nih kan caah thiltha a tuah hi aa lawm zungzal mi a si. Sihmanhsehlaw kanmah minung duhnak kha Pathian duhnak he aa khah lo tikah kan hal mi cu pek kan si tawn lo. Paul nih a keng cungah a um mi hling kha lakpiak dingin a hal, sihmanhsehlaw Pathian nih a lakpiak duh lo. " Ka vel hi na caah a za ko!" tiah a leh. Paul nih aa ruahnak ahcun tha chinchin in amah Pathain caah rian kan tuan kho chinchin lai tiin ruahnak tha a ngeih mi zong a si ko lai. Sihmanhsehlaw- Pathian nih a hmuh ning le duhpiak ning cu a rak i dang. 

Cucaah kanmah duhnak in Pathian riantuanter siloin, Pathian duhnak tu kha kan duhnak a si khawh nakding ah thla kan cam deuh ding a si. Bawipa- ka duhnak hi na duhnak he aa khat mi si hram hna seh. Kan nunnak caah na duhnak hi ka hngalhter ko tiin, Pathian sinah thla kan cam ding zong a si. 

Zumtu hna nunnak le thlacamnak hi aa then kho lo. Cucaah thawngtha chimtu hna nih thlarau tampi an tlaih tikah; a hnu lei in thlacam piaktu an ngei zungzal. Vancung khua ahcun cu thlacamtu hna zong cu laksawng an hmu ve lai. Ziah a nih cu thlarau tlai a tlaih tung hna lo, zeitindah keimah he kan laksawng cu aa khah khawh, tiah kan ruat kho men. Sihmanhsehlaw mithmu lo in thla an rak cam zungzal nak thawngin hlawhtlinnak ka hmuh mi an si. Kan nun chung caah siseh, kan thih hnu caah siseh; sunghnak a um lomi tuahsernak cu thlacamnak hi a si. Mizei hmanh "caan" ngei lo lakin a si a faak bal lo. Aa tluk ruang tein caan pek cio kan si. A nih a tam deuh/ a tlawmdeuh ti zong in Pathian hmai ah phisin awk a tha lo. 

Careltu vialte nan thlacamnak Bawipa sinah phan ko seh! 

Bawipa nih nan thlacamnak cu hlawhtlinter ko seh!

Cuticun Bawipa nih sunparnak le upatnak vialte cu hmu camcin ko seh!