KHUATLIRTU DAL (3)NAK

Cuticun Lucy cu a liamcia caan ah thil a cang mi hna a ruahpah in a thil hna a von I thleng. Thlalang nganpi chung ah a pumrua aa zoh. A ke zim in a sampar tiang tha tein aa zoh. David nih Lucy cu mileng khaan in a hngah ko. Lucy cu a rakchuak, “Rose pangpar bantukin, naa dawh, Lucy ”a ti pah nih abuaa von pek.

Cun an thitumnak puai a hmang mi hna mangtha va cah ta dingin an va kal. Tuzan ah London Claridge ah caan hmang ding an si. Cun David cu Biggin Hill ah a kal lai ii, Lucy cu a nulepa sinah kir than ding a si. Ralchan lio a si caah cu zankhat te lawng cu caan an ngei.

Rawldumnak inn khan chungin mawtaw cungah an kai ii mirh le kut zauh buin, mawtaw cun an kal. Mileng le chungkhat hna cu kutthlir mangtha cah pah in an kal tak hna. Bawmchung ah zu thok khat a um tiah David nih a ti. Lucy nih kuang cu a von kau. Champange thok khat le thlalang hrai caaku in tha tein fun mi a hmuh.

London khuapi cu a kikpah rih ngaingai. Lucy nih thlalang hrai ah Champange cu a vonthlen. David nih “Tuzan zanriah ei kan thlai men lai”tiah a ti. Lucy nih “Zeidah a poi”a ti pah Champange hraikhat cu David a von pek.

Lucy cu rangtuk in a din caah a ri pah ii, a mit a kut ngaingai. David mawtaw mawngh cu a rang thluamah. St Louis Blues timi hla huuhuk pah in mawtaw cu a mawngh. Lam mei te hna a rawk ii an mit pah hna. Culio ii mawtaw rangtuk mawngh cu khuaruahhar ngai a si ko.

 Asinain David cu London khua chung luhnak lam a hngalh ko. Zalam te cun a hun kal thluahmah. Lucy nih a mit khat lei chinh pah in hmailei cu a zoh ii, a mui ngaingai cang. Cu tum caan a von si. Lucy nih Thilphor mawtaw nganpi thawng a theih.

Lucy nih David “rang tuk in na mawngh rua”tiah dinte le nemte in a chimh.

Lam nih a kuaih mi ngai. Vanlawng mawng ciammam. Cu zongahcun David cu rang ngai in a mawngh. Lucy nih “na vanlawng ah maw na ruah”tiah a ti.

Tlawmpal ah Lucy cu “Davidddddd………..!”tiah a au.

Lucy te mawtaw le an hmai ii a kal mi thilphor mawtaw nganpi cu an I pah ai.

Ram dang mi hna nih  Spy an ngeih. British (England) nih Military Intelligence (MI) a ngeih. Cu lio ahcun kum 1940 hrawng ah a si I a fawi nakin M.I tiah an auh hna. M.I cu raltuknak ding caah lamkhat in aa tel ve mi an si. M.I cu an karh ngaingai. An thlaih mi hmunhma le thil kong hoih in kau ngaingai in an I then hna. M.I9 tiang an um. M.I9 cu Europe ram kip ah an kal ter hna. M.I8 hna cu ral pawl thli chungin an I biakchonhnak vialte an tlaih dih. M.I6 nih France ram ah khuathlirtu an thlah ve.

1940 kum ii Godliman a luhnak cu M.I5 ah a si. Military Intelligence cu ram a daih lio ahcun ralkap hohanak tangah a cawlcang. Godliman cu zungah cun a kal ii, mi an tam ngaingai mi a hmuh. Nikhat nak ah M.I5 zung riantuan pawl a cheu cu theih khawh aa zuam. Culioah amah College ah Department pakhat ah riantuan ti mi pa zong a hmuh ve. Cu pa Detective Novel pawl a uar ngai mi a si. Atu cu ruah lo piin M.I5 ah riantuan mi a si a hngalh. Cu a hawipa cu zing suimilam 10:00A.M hrawngah M.I5 zungah a rak ra.

Terry cu bia kaa khat hmanh chim loin, cabuai cungah a phan ca cu a zoh ii khua faak piin a ruat mi a lo. Godliman cu ka thu lai maw, thu lo ti aa lak lawh ngai. Cun tlawmpal a rauh ah Terry cu a dang kuak pakhat fawp dingah meitek a cuk than.

British ah a um mi a um mi Canaries spies hna cu santlai lo an si, an si tiah a ti. Kan hnu ah Dorothy O’Grady cu kan tlaih. Zeitindah ca a tial na thei maw? Dawr sawhsawh ii a thli thup cakuat tialnak in a tial men ko, tiah a ti.

A dang Spy kong cu September ah aa thok than. A rian cu British ralkap nih ramdang ah ramkauhter in tuk a timh mi a um maw? Zei lam dah an hman khawh? Leilawng lam, Tilawnglam, Tlanglawnglam,Vanlawng dinh hmun vialte ngiat thlai ding a si.

Tha tein cawnpiaknak a ngei mi, a thiam mi cu an thim ko hna nain, thilri tlamtling in an pe kho hna rua lo. Culakah 23 September zan ah British ram chung alut mi hna cu Meier, Keeboom, Pons le Waldberg an si. Keboom le Pons cu Hythe pawngah an tum. Asinain Somerset Light Infantry nih an tlaih hna.

Waldberg cu Humberg khua ah thawng a thanh hna. “HIM TEIN KAN PHAN. KHUALTLAWNNAK THILRI KAN HRAWH DIH. MIRANG RALKAP CU RILI IN 200M HLAT AH KHUA AN HNGAK. TLANGLAWNG LAM CU 50M HLAT AH A UM. LEIPHUM BOM PAWL A UM. RALKAP TLAWMPAL AN UM. SAK LIO IN INN PAKHAT A UM. LAM THAR AN CAWH. WALDBERG, tiah thawng a thanh hna.

 A taktak ahcun khua zei ka phak ti hmanh aa thei lo. Zan suimilam 9p.m ah Super Market a kal. Cider cawk ka duh tiah midang a hal hna, tiah Terry nih British ii a lut mi Spy pawl kong cu Godliman a chim.

Godliman cu Waldberg kong a chim mi cu a nih a chuak tuk. Terry nih “Um rih,! Cu nak in nihchuak a si mi a um rih”tiah a ti.

Inn a hlannak pa nih zan suimilam 10 p.m rak tin te, khua chung biakinn ah len ka duh a ti. 10p.m bak te ahcun a rak tin cuka ahcun Police pahnih nih an tlaih.

Meier cu cu hnu tlawmpal ah an hmuh. Cun a dang Spy 11 zong British ramchung ah an ke an tlak cangkate in an tlaih khawh hna. Kan ram chung Spy a lut mi an dihlak dengmang cu an tlaih khawh cang hna, tiah a ti.

Godliman nih khuaruahhar pah in, “A dihlak dengmang ee?”tiah a ti.

Terry nih “A si. A dang pawl cu Eire ah an tum hna. Cu lakah pakhat cu lentecelh puai ah entertainer minthang ngai mi Ernts Weber-Drohl a si. Ireland ah lakfa pahnih a ngei mi a si. Cucu Garde Siochana nih a tlaih khawh. Section B-1(a) ah an kuat cang.

A dang pakhat cu Hamann Goetz a si. Eire tum loin, Ulster ah a tum sual. IRA nih an hmuh. A bawngbi chungnawh lawngte tilio tlik aa tim. A donghnak ah aa ken mi thihsi a ding. Cu pa sinah “Made In Dreshen”timi datmei pakhat kan hmuh.

Terry nih “ruahdingmi le a harmi thil tampi lakah pakhatnak cu; mizeidah an si? Khuazei ahdah, zeibantuk minung in an um timi pakhat hmanh thawng pe tu kan ngeih lo buin kawl ding an si. Pahnihnak; Kan zumh mi hna minung he rian kan tuan ti lo. Cucaah Section B-1 (a) timi a chuahnak a si.  Hi kong chim ding ahcun kum 1936 in thok a hau.

“Alfred George Owens cu Electric lei Engineer a si. Cozah nih pek mi contract pahnih le riantuantu a ngei hna. A luancia kum 30 chung German ah a tlawng lengmang mi a si. Cu German ah thil a cang mi thil thar tlawmpal tete thawngpang a pek lengmang hna.

A donghnak ah Naval Inteligence nih MI6 in rian an pek ii, MI6 Agent pakhat ah aa cang. Asinain zeitluk zumawktlak lo dah a si ruat hmanh. MI6 kong German sinah a zuar chin. Cucu German Spy pawl hna nih an ramah thawng an thanhnak in kan theih khawh than. Kaphnih caah rian a tuanmi a si. MI6 nih “Snow”tiah kan auh. German “Johny”tiah an auh. Snow nih rian peknak ca a hmuh mi cu (1) Wireless transmitter hman ning cang chuah pi ding (2) Victoria tlanglawng Station  cheknak khaan chungin tlanglawng ticket pakhat ngah khawh i zuam ding ti a si.

Cucu tlamtpal ah Snow cu an tlaih. A suitcase chungah wireless transmitter pakhat le Victoria Station tlanglawng citnak ticket cu an hmuh. Cuticun Wandsworth thongah an khumh. Asinain Humburg he pehtlaihnak a tuah peng. Asinain atu cu Snow nih a tial mi si ti loin MI5 ii, Section B-1 (a) nih Snow min in pehtlaihnak an tuah mi a si.

Cun Abwehr nih German ramchung ii a dang Spy pahnih hna zong pehtlaihnak tuah a fial rih. Asinain an kan theih colh. Wireless transmitter hmanning te hna cu an pek ko. Sihmanhsehlaw kan caah san a tlai lo.

Snow cu Charlie, Rainbow, Summer, Biscuits le a donghnak ahcun ralkap hna zong nih a thli tein an zulh peng. An zate in Canaris he pehtlaihnak a tuah mi lawngte an si. Cucu British Counter Interligence ngiatnak tang a um mi a si.

Cuticun British ram chungah a um German spy vialte cu MI5 nih tlaih khawhnak ding ruahchanhnak hmete a ngeih.

Cubantuk kaphnih riantuantu hna cu hmangin kan ral pawl kan hlen khawh hna lai. Zeicatiah anmah zong nih kap hnih riantuantu an si an theih ko nain, midang a rolhtu ahohmanh an thlah hlei hna lo, tiah Terry nih cun a chim

 Godliman nih, ‘Cutluk in a fawi lai lo da kaw”tiah a ti.

Terry nih thlalang awng a on ii, a kuak zuknak a hlonh pah in, “fawi bak hlah. Asinain thawng an kan pek mi a hman lai, hmanlai lo timi cu um ko seh. An I pehtlaihnak thawngin British ram chungah German spy zeizat hrawng dah an um timi kan theih ahcun a za ko. Abwehr le a milaang pawl nih zu cu khuazeidah a um timi kan hnimh khawh ko lai”tiah a ti.

“Thinlung a cawlcang ngai”tiah Godliman nih leh.

“Hika a um mi mikip nih riantuan caan a sau. Tha bat caan a tam. Faak piin I zuam a herh mi a si, tiah an in chimh ko lai. Asinain na chim bantukin thinlung a cawlcanghter ngaingai”tiah Terry nih cun a leh.

Cun Terry nih kan zung a thluak a tha taktak mi mino te pakhat he theihternak kan tuah lai. Rak ak zul tiah a ti. Cun Terry zungkhaan cun an pahnih an chuak. Hleikaa in a cungah avon kai. Cu innkhaan karlak kalnak lam saupi an kal thluahmah. Cun Terry nih “Amin Federick Bloggs a si. Rian kong he capo chim a duh lo mi a si. Scotland ram ri in kan laak mi a si. Kut le ke na herh ahcun amah na hman khawh. Amah nakin rank sangdeuh ah kan chiah lai”tiah a ti. Asinain mah tluk cun chiah awk as I lo nain tiah a ti pah.

Cun  Terry nih “Federick Bloggs, Percival Godliman hi na sinah kan chiah lai”tiah a ti I a kal tak hna.

Bloggs cu a sam meikhu rong a si. A niam pah. Asinain a mirh pah in a um ii Godliman a hna a ngam deuh. A kut mi tlaih ning cu a fek. A thawng.

Bloggs “atu pei chuncaw ei ah ka tin lai ka ti cu. Rak ka zul ve ngat. Kan nu nih Sausage le Chips hna a tuah”tiah a ti. A awcawi cu a kua in, a nganpah.

Sausage le Chips cu Godliman uarphun a si lo nain a zulh. An ke in Trafalgar Square an kal. Cun Brixton a kal mi Bus an I cit. Blogg nih “nupi dawh te kaa thiit. Asinain rawl chumh a thiam lo ii, nifatin sausage le chip lawngte ka ei”tiah a ti.

East London cu nizan ral pawl nih bomh an rak thlak caah meikhu hna an tlau rih. Meihmit hna, lam cungah a tla mi thing le lung hna, lam a rawk mi le vawlei tang meihri a rawk mi hna an ser, an thianh hna. Cu lio ah Inn a cheu a cim dihnak hmun in tarpa cu Radio put in a rak chuak.

Godliman nih a bia chim a ngaih dih in. “Spy pawl a tlai ti ding kan si ko lo maw?”

 “Perce lei ah kan kal aherh”tiah a ti.

Blogg in ihnak khan pathum a um. Innkhat pahnih then mi (Semi detached house) a si. An inn hmai hmun a lawng chunh te cu tisik anhnah cinnak ah an hman. Mr. Bloggs nupi cu Ambulance mawtaw mawng a si. Amin ah Christine a si. Mr Blogg cu a nupi kong a chimpah in a lung a hmuih ngai. 

“Zingka ka thawh ah kan inn hi  a cim dih sual lai ti ka phang tawn”tiah a ka ti. Keimah nakin kan inn he a um lai lo a thinphang deuh tiah capo ah a chim pah. Inn chung an von lut I cabuai ah Medal a hmuh. Godliman nih a lak ii zeitindah hi medal nih na ngah khawh? Tiah a ti.

A nupi Christine nih “Post Office misual nih a ramtu misual pistol a chuh khawh”tiah a ti.

Godliman ih “Woo…na ral atha ko ee”tiah a ti.

Bloggs nih “Nupi na ngei cang maw? “tiah a ti.

“Ngei lo” tiah a leh.

“Sorry…”

“Nupi ka rak ngei bal. TB zawtnak in 1930 kum a ka thih taak. Fa kan ngei manh lo”tiah a ti.

Bloggs nih “Kanmah pakhat te hmanh kan ngei. Kan rampi nih le hi dirhmun a si”tiah a ti.

Christine nih, “Fred, fa ngeih kong cu theih a zuam phun asi lai lo” tiah a ti ii, coka ah a kal tak hna.

Christine nih a tuah mi hna cu a pum mi cabuai cungah a chiah hna. Blogg le Godliman thaw ngai in an ngei. Chips le Sausage a duh lem lo nain Godliman zong thaw ngai in a ei.

Blogg le Percival Godliman cu zung an phak cangka in, Blogg nih ahodah a si tiah theihfian a si lo mi German spy kong file cu a hmuh sak. British ram chung ah um ko lai tiah zumh a si.

Cubantuk kong thawngpang an theih khawhnak hmun thum a um. Pakhat cu Home Ministry sinin ramchung le ramleng michuak cazin in an zoh khawh. Lah-wah-kah, passport tuahnak zung, British ram chung a lut cang nain ral a thawh tikah a kir rih lomi hna cazin zohnak in a si. A cheu cu a thi timi zong an um. A cheu cu umnak theih lo in a thlau mi an si. Blogg I a file chungah cun an umnak theih khawh lomi min cazin hna tlawmpal an um.

Pahnihnak cu wireless in biakchawnhnak in a si. Section C MI8 nih thlichung biakchawnhnak vialte tha tein a dothlat a zoh hna. Cekhlatnak a tuah hna. Cun biafang theih lomi te hna cu cozah sinah ap lengmang.

A donghnak cu kaphnih spy hna an si. Anmah sinin British ram chungah spy pawl an luhnak kong theih khawh a si. Anmah nih cun an chim lo nain an I pehtlaihnak hna zulh in spy an umnak cu theih khawh a si.

Pathumnak cu tuah cuahmah lio mi a si. Europe ii spy bu pawl pehtlaihnak network hi MI6 nih a tuan cuahmah lio a si. Hitler’s i ti chung Lawng an hrawhnak te hna cu ramleng sin thawngpang an theih mi a si.

Cun Radio in an tlaih mi aw ‘records file”pakhat a rel. British nih Finland ram ah ralkap thlahnak dingin kong a si. A dih hlan ah ….thil pakhat khat nih a hrawh. Cun caan sau nawn a rauh hnu ah aa pehthan mi a si.

Godliman nih “Regards to Willi”timi hi zeidah a si, tiah a hal.

Blogg nih “Um…mahka zawnte kha a biapi mi cu a si”tiah a ti. Godliman cu theih duhnak thinlung a ngei chinchin.

Bloggs nih “hika hi a dang zoh than. “Regards to Willi”timi a um than. Asinain bialehnak a si” tiah a ti. Cun “Die Nadal”timi zong aa tel.

“ Thimfang -Needle” spy vawlei ah a thiam tuk mi a si lai. A thawngthanhnak te hi zohhmanh sipuazi kong bantukin fiangte, tawite in a langhter.

Godliman nih ‘Amah kong zei thawngpang dang kan theih mi a um maw?”tiah a hal.

Bloggs bialehnak nih Godliman a lung a rawhter ngaingai.

“Die Nadal”tiah  amah min aa chim. “Regards to Willi”tiah a dongh ter. Mah leng in kan theih mi a um lo tiah a leh.

Godliman cu cabuai cungah a thu I, thlalang awnglei a mit thep loin a zoh. A lang mi cu an zung hmai ii inn ngan pi vanpang a si. Vanpang ahcun dawh ngai in tamh mi thlalangawng cu tep lo in a zoh.

DAL (4)NAK PEH THAN DING............