Na Thinlung Mit Nih Zei Thil Dah A Zoh?

Phungtlukbia (4:25) 
Na mit nih ding tein hmailei kha zoh ko hna seh, na hmai i a um mi thil cu fek tein i zohchih ko.

Nihin ah zei thil dah na mit nih na zoh? Na thinlung mit nih tah zei thil dah a cuanh? Na thinlung le na mit nih na hmailei khua ding tein an cuan maw? Asiloah vuivai in dah an um? Hmailei thil cuan loin, liamcia na palhnak, na tlamtlinlonak, naa ngaichihnak hna na cuan sual maw? 

Kan taksa pum cu kan mit nih a hoihnak leikap, a cuanhnak leikap ah a kal. Minung kan nunnak zong kan thinlung nih a cuanhnak nunnak lei hoih in kan kal ve. Cu ruangah hi Baibal nih ding tein hmailei zoh ding a kan cawnpiak. Kan cuanh mi thil zeidah a si timi a biapi tuk. A siloah kan sirvan ah a um mi thil hna kan zoh i, kan cuanh ahcun kan dir a hau. A siloah kan sirvan zohpah buin hmailei kan kal ahcun kan tlu ko lai. Kan dir ahcun hmailei kan kal lo tinak a si. 
Cucu kokek sining nih a kan cawnpiak mi a si. Kan taksapum nih hmai lei kal a duh tikah hnulei zoh buin le sirlei zoh buin kal khawh a si lo bantuk in, kan nunnak zong liamcia caan i kan rak i palhsualnak, kan rak hruhnak le tlamtlinlonak vialte kan thinlung mit nih a cuanh lengmang ahcun hmai kan kal kho lai lo. Kan sirlei in thangchiatnak le thatthatnak, conglawmhnak le congawihnak hna nih an kan au hnawh zongah zoh loin hmailei lawng cuan in kan kal a herh.  I laksual lo ding mi cu congawihnak le conglawmhnak cu cohlang hlah ti duhnak a si lo. Hmaitonh in na tonpah lio ah tha tein conghlang ko. Sihmanhsehlaw, sirlei mer in, hnulei mer in zoh a herh ti lo. 


Kan thinlung nih kan hnulei thil le kan sirlei thil lawngah an cuanh ahcun hmailei nunnak zalam cu tlolh a fawi te. Pathian zong nih hnulei kan nuncianak ah nunter a kan duh lo. Amah thatnak le a dawtnak, a biakamhnak cungah zumhnak he hmailei ah a kal mi nunnak ngeihter a kan duh. Kan thinlung mit nih Pathian biakamnak cu cuan zungzal seh law, zei bantuk harnak hmanh tong usih kan co ding mi harnak le kan hmuh ding mi Pathian biakamnak laksawng cu tahchunh tikah an i thlau tuk. Kan hmuh ding mi laksawng cu a ngan tuk hringhran. A sunglawi tuk hringhran.  Pathian biakamnak, kan caah Pathian nih a kan chiahpiak mi laksawng, teinak le thluachuahnak hna lawng cuan ko usih. 

Kan thlarau mit nih vanram cuan zungzal ko seh. Jesuh he hmun khat te ah zungzal khuasak khawhnak hmun cu ding tein cuanh buin kal ko hna usih.  Kan cuanh mi thil- in pial sual hlah usih.