Electric Bulb pakhat cu ceunak a chuahter kho cu electric socket plug ah aa bunh lo ahcun amah tein ceunak a ngei kho lo. Thawnnak le ceunak a chuahtertu Generator sinah wire hri in pehpiak hnu ah muihnak chungin ceunak a kan pe kho. Cu bantukin minung (zumtu) hna kan nunnak zong hi kanmah tein zeihmanh ceunak i pe kho lo. Pathian kan pa sinah Jesuh sinin pehtlaihnak kan ngeih lo tikah kan nunnak vawlei cung sual muihnak nih a uk tawn. Midang sinah kan ceunak a lang kho lo.
Baibal nih a kan cawnpiak mi cu ahohmanh kan si ah Jesuh sinah kan um i Jesuh cu kan sinah a um ahcun thei tampi a tlai kho mi kan si. Misur zong a ruang ah aa pehtlaih lo ahcun a tlai khawh lo bantukin zumtu kan nunnak zong hi Jesuh ah pehtlaihnak kan ngeih lo ahcun kan thei a tlai kho lo. Thei pakhat a tlainak dingah dawntu thil tampi an um. Cu bantukin nifatin in khrih he kan i pehtlaihnak ah a kan dawntu thil tampi an um ko lai. Sihmanhsehlaw kan nunnak hram a si mi Jesuh khrih he kan i pethlaih kan cahter lo a herh.
Kan nunnak hi zeibantuk thil nih temtawn hmanh sehlaw, khrih he fektein kan i pehtlaihnak thawngin thei kan tlaiter khawh ko. Kan nunnak hi khrih he kan i then ahcun mitsur ruang ro bantukin zeihmanh santlaihnak a ngei lomi kan si ko lai. Thei tlai khawhnak zong a ngei lomi, kan si ko lai. Sihmanhsehlaw Electric mei nih ceunak ding ah thawnnak a petu generator he aa peh lawngah thathnemnak a ngei bantukin le mitsur ruang nih a kung he aa peh lawngah a hnah a hring ii thei tlaikhawhnak a ngeih bantukin, nifatin kan nunnak ah khrih he kan i pehtlaih lawnglawng ah kan nunnak sullam a ngei. Theitha kan tlai kho ve.
Nitin kan nunnak ah khrih he pehtlaih zungzal usih.
No comments:
Post a Comment