Ruahchannak Hna A Dongh Tik Ah

Theipi kung cu par loin, Mitsur ruang zongah a thei um hmanh hlah seh, Oliv thing cu tlai loin Lo zongah tirawl zeihmanh chuak loin um hmanh seh, Kawm chung satil run kha um loin Satil inn ah satil kha um hmanh hna hlah seh law, Bawipa ah cun kaa lawm thiamthiam ko lai i, a ka khamhtu Pathian cu ka lawmh thiamthiam ko lai [ Habakkuk 3:17-18]

Prophet Habakkuk nih ruahchannak hna an dongh tikah zeidah ka tuah awk a si timi a hngalh. A cunglei a tial mi kan zoh tikah,ngaihchiatnak le sunghnak le rawhralhnak zeitlukin dah a intuar timi a langhter. Zeihmanh a ngei lo. Hawikom zong a ngei ti hna lo. Cu bantuk caan lio ah Habakkuk nih zeidah a tuah? 


Habakkuk nih a tuah mi thil cu aa dawh tuk hringhran. A nunnak nih zeibantuk thil sining hmanh tong seh, Bawipa sinah lawmhnak tu in caan hman aa thim. Habakkuk nih a theih mi cu,"Bawipa Pathian cu a ton mi  harnak thil vialte nakin a ngan deuh mi Pathian a si"timi hi a si. Bawipa nih hi ka sining le ka dirhmun in chuahnak lam, luatnak lam a ngeih cang ko timi a hngalh. Habakkuk nih a zoh mi cu a harnak kha si loin, a harnak pinlei ah Pathian nih zeidah a tuah khawh timi kha a si. 

Nihin zongah Habakkuk tuahsernak hi i zohchun hna usih. Thil dik lo hna na sinah an phak tikah- Bawipa cu lawm ko. Na intuarnak a fah ruangah siloin Bawipa nih luatnak lam a hngalh caah lawm ko. Thil sining hna cungah ruahchannak a um ti lo tikah - Bawipa cu thangthat ko. Zeicatiah Bawipa nih cu a sunglawi deuh mi thil thar an pek lai caah a si. 

Kan ton mi thil vialte cungah a phichuak a hngaltu cu Bawipa kan Pathian a si. Nihin kan dirhmun zeibantuk hmanh si ai kun. Bawipa cu lawm ko usih. Harnak nih a kan kulh dih zongah a min cu hlorh ko usih. Zeicatiah Bawipa nih kan caah thil tha a timh zungzal timi a hngalh mi zumtu kan si. 

Kan Ruahchannak An Dongh Tikah :- Bawipa cu thangthat usih!