Zumlotu Hna Hmai Ah Mithmai Tha Na Hmu Maw?

“Cuticun a zum lomi hna hmaizah kha nan tong lai i, cuticun nan herhbaunak ah khan ahohmanh i rinh nan hau lai lo." [1 Thesalon 4:12]

Nihin kan nunnak hi midang nih an kan zoh tikah zeitindah an kan hmuh hnga? A bik in zumlotu hna nih zumtu a simi nangmah le keimah kan nunning an kan zoh tikah zeidah thil an hmuh hnga? Kan nunnak nih zumtu hna hmaizahnak le upatnak kha a hmu maw? Khrihfa cu vawlei cungah Jesuh khrih ai-awh tu kan si. Zumlotu hna hmaiah mithmai tha a hmu deuh mi siding ah kawh mi kan si. Kan nunnak muisam nih Pathian sunparnak langhter dingin timh mi le kawh mi kan si. 

Cathiang nih hmaizahnak kan hmuh khawh nakding ah "va kal law thil pakhat khat va tuah" tiah a kan fial lo. "Zuamcawhnak ah teinak sui taisawm va hmu law, na Pathian sunparnak cu zumlotu nih hmu hna seh" tiah a kan ti lo. "Fimcawnnak ah, lentecelhnak ah, hlasak zuamnak ah pakhatnak lawngte va hmu law, Bawipa sunparnak cu langhter tuah" tiah a kan ti lo. Sihmanhsehlaw Pathia nih a kan fial mi cu "NIFATIN NA NUNNAK IN" zumlotu hna nih Pathian sunparnak an hmuh ii, hmaizahnak an in pek ding kha a kan cawnpiak mi a si. Cu nunnak muisam nih a langhter mi cu midang nih an in hmuh lo zongah thiltha a tuah kho peng nunnak kha a si. Na pawngah midang an um lo caan zongah nunthiannak he a nung mi nunnak ngeih kha a si. Remdaihnak in zeizong vialte a tong mi nunnak, zumhnak le lunglawmhnak he a khat mi nunnak muisam kha an si. 

Ka nunnak muisam cu dawtnak le aa dawh mi thinlungput in kan tamh tikah kan nunnak ah Pathian sunparnak cu a lang. Pathian he nifatin caan kan hmantinak nunzia dawh in kan thuam chinchin. Cuticun zumlotu hna nih kan nunnak muisam an zoh tikah Pathian sunparnak an hmuh ding kha cathiang nih a kan cawnpiak mi a si.