Zeithilhmanh Pakpalawng An Si Bal Lo

Pathan nih hin Amah a daw mi caah le Amah nih aa tinh mi ningin a kawh mi hna caah cun, zeizong vialte hi a ṭha lei ah a serpiak ko hna ti kha kan hngalh (Romans 8:28).

Minung nunnak zalam ah cho kai caan a um lai, chuk ṭum caan a um lai. Kuai hngirhngiar in a umnak zong a um lai. Lam kuai le lambo hna zong an um ko lai. 

Mizeipaoh nih nunnak zalam ah zuamcawhnak le harnak ton ding mi kan ngeih cio.

Sihmanhsehlaw cu thil vialte cu Bawipa nih a lak (man ngei lo) in a liamter hna lai lo. Na nunnak chungah na hmuhton mi thil vialte hi pakpalawng an si bal lo. Na lungrawhnak, na umharnak, dawnkhaantu thil vialte, umhar in nangmah lawng na um caan hna, zuamcawhnak le harnak vialte hna cu Bawipa nih Amah nih aa tinh mi ningin a kawh mi zumtu kan caah cun kan ṭhatnak caah a thlen dih hna lai.

Harnak caan ah Bawipa nih thinlung lei in nutling patling na sinak thanchoter an duh. Inkhawhnak thazang na ngeih mi ṭhangchoter an duh. Sifahnak caan cungah nunzia ṭha le nunzia thiannak kong cawnpiak a kan duh. Bawipa nih kan nunnak chungah harnak hi a kan pe lo. Sihmanhsehlaw vawlei nih a kan pek mi harnak hna cu Bawipa nih kan caah thil ṭha ah a thlen khawh hna. Harnak sobul in tuk le den kan si tikah Bawipa nih zei mansung deuh mi ah ser a kan duh caah a si. Sobul in tuk le den ciocio carbon nih thir tha le ṭha lo cu a langhter. An zuamcawhtu hna cu na nunnak ṭhancho caah arrhlei bantuk an si.

Nihin ahharsa ngai in na um kho men.Hihi philh hlah. Bawipa nih zeihmanh a lak a si ter lai lo. Na nunnak caah ṭhatnak pakhat khat an petu ah a thlen hrimhrim hna lai. Kan thinlungput cu hi bantuk in a si awk a si. “Nihin cu ni thar a si. Pawngkam thil sining vialte cu keimah ṭhatnak ca i bawmtu dingah a kal mi lawngte an si. Harnak cu a ka dawntu thil an si lo. A ka bawmtu ding an si. Bawipa nih ka nunnak chung i harsatnak ka ton mi vialte hi ka hnangamnak petu ah a thlen hna lai. Ka nunnak ah harnak mei khu aa zel mi hna cu Bawipa nih lumnak a ka petu le ceunak a ka petu meiceu ah a thlen hna lai.” 

Cu bantuk thinlung kan ngeih tikah kan nunnak chungah Bawipa nih ṭhawnnak cu faak piin rian a ṭuan chinchin.

“Kapa, Pathian, Nangmah he naihchin ah na ka um ter caah kaa lawm. Nangmah mithmai te ah umkal khuasak cu kan duhtuk hringhran. Zeicatiah Nangmah he cun ka nunnak chungah zeithil vialte hi pakpalawng an si bal lo. Harnak caah chungah na ka cawisannak le na ka kilvennak cungah kaa lawm. Teinak hmun na ka phakpi hlan ah na ka cawi lai I, na ka kal pi lai ca zongah kaa lawm. Jesuh min thla ka cam”Amen!